Civil hospital OPD leh Health Minister

Aizawl Civil Hospital hi mipui tan a hlu a, mi harsate tan a hlu zual. Civil hospital-ah hian July 2017 thla khat chhung khan damlo mi 37396 zet en an ni a, phaia refer mi 238 zet an awm bawk. Kum khat chhung phei chuan damlo inentir hi tam tak an ni dawn a, thawktute pawh an hah hle ang.

Civil hospital hi sorkar dam­dawi in a nih angin a thawktute pawh sorkar hna thawk an ni a, damlo enkawl leh mipui biangbiak kawngah pawh private damdawi in dangte anga beisei san ngam chu an ni hauh lo. Civil-a thawktu doctor leh midangte hian damlo mangang leh harsa zawk mi tam tak chu anmahni suma ṭanpui te pawh an nei fo a, an fakawm hle.

Damlo mangang tam tak nunna an chhan tawh a, mi tam tak an thi tawh bawk a ni. Ka sawi duh lai chu OPD inentirna bikin beisei an phak loh zualna lai tlem a ni. Civil hospital inentirnaa an hnathawh hun (timing) hi dar 9:30am - 3pm vel a ni a, mah se heti chung hian chawhnu dar 2 ah chuan inentir tur damlo an awm mang tawh lo a, thawktute leh doctor-te pawh an tlem pharh tawh ṭhin.

Hetiang hi a nih laiin OPD card hi inentirna department ṭhenkhat chuan dar 11:30 hnu lamah chuan an la ngam tawh lo a, inentir tum damlo mangang tak tak la awm ṭeuh mah se doctor ten an en theih zat tur an hriat ṭhin loh avangin eng zat nge lak tur tih an hre lo a ni. Hetianga an tih hian chawhnu dar 2 hma chuan damlo inentir tur an awm tawh mang ngai lo a, chu chu thawktute tan chuan hahdamthlak ve tak a nih laiin damlo hrehawm tuar mek, private hospital-a inenkawlna tur pawisa nei lote tan erawh thil pawi tak thleng thei a ni.

Hetianga OPD card theh luh hun hma taka an khar chhan dik tak hi ka hre chiah lo a, damlo ko luttu hming lamtute erawh dem ngawt theih an ni lo ang. Anni hian damlo mangangte card hi a nih dan tur ang taka an inentir theih nan lo laksak zel ta se, doctor ten an kam khat thei tlat. A chhan chu Aizawl Civil Hospital-a thawk doctor thiam leh chhuanawm tak takte hi private clinic lama buai tak takte an ni ve bawk.

Chutihlai karah doctor ṭhenkhat chu hna an kal theih loh tur thu pawh sawi lawk loin hun tepter takah an kal theih dawn loh thu an sawi chauh a. Hei vang hian doctor te an lo kal kim dawn em tih leh, damlo entir tur mi engzat nge lak tur tih hi card lo dawngsawngtute tan hriat theih a ni lo.

Tichuan, doctor-te hi an kal kim ta hlauh a nih pawhin damlo an en zo hma a, an awl hma mai a. Tunlai hrileng tam thlaah pawh chawhnu dar 2 velah chuan inentir tur an awm tawh mang lo a, chu chu damlo mangang inentir duh inentir ve hman ta lote tan chuan pawi tak a ni a, an duty hun darkar khat zet te nitina thai bo a ni hi thuneituten en nawnin mipui tan tih dan ṭha zawk han ngaihtuah chhuak se a duhawm hle.

Health Minister tana thil hriat har tak, thawktu ṭhahnem ngai leh mipui ṭanghma ngaite tana buaithlak tak pakhat leh chu bungraw chhia ngaihsak lawk loha a awm saw a ni.

Tun thla tir khan dental department-ah ha entirin kan kal a, dental chair 4 a awm a, 3 chu ha phawi nan bak hman tlak a ni lo. Dental chair pakhat chiah hman tlak a awm a, khatiang dinhmunah khan dentist doctor 4 pawh duty se hna thawh theih a nih miau loh avangin inentir tum damlo tam tak beidawngin an haw phah a ni. Thawktute, leh doctor-te ka dem ngawt lo, mipui tana an inpekna a zahawm a, bungraw ṭhat loh vanga hna thawk thei loa an awm kha a pawi a ni. Bungrua enkawltu company thiam loh pawh a ni thei a, hei tak hi chin fel ngai chu a ni.

Dental chair chhia hi dentist doctor duty rei fal pakhat chuan siam ṭhat tumin a lo phelh darh a, a ṭhahnemngaihna kha a fakawm. Khata duty-te kha amah ang vek kha ni se chuan mahni duty ṭha takin an ti ṭheuh ang. Mahse, vil ngai lo tura ngaih thawktute pawh saw duh duh huna hna kal loa haw hma ching an awm ve thei a; head of department tan pawh hei hi chona lian tak a ni awm e.

Damlo te mamawhna sanzia hriain a enkawltu Minister hian Civil hospital hi surprise visit te pawh nei ṭhin se a duhawm hle. Bungraw chhia hi a enkawl (maintain) tura Mizoram sorkarin thuthlung a ziah pui company-te thiam loh nge thawktuten hna awl theihna remchanga hmangin an report-in an siam tir zung zung lo zawk tih hi mipuite nunna thui tak innghahna Health department enkawltu Minister hian chhui chiang se a ṭha hle mai.

- Ramhmangaiha