TUNLAI THIL AWMZIA

Drugs abused: Hmanni lawkah Central YMA hotute huaihawtin kan rama drugs hmansual chungchang sawiho a ni a, he sawihonaah hian kan Chief Minister leh sawrkara mi langsar tak tak an tel. YMA hian an tih tur dik tak an ti a, mah se kan sawrkar hotute hian zahna chang an hre miah lo thung.

Ram chhunga buai­na chi hrang hrang te hi, ruihhlo avanga buaina telin sawrkar hmalakna tur liau liau a ni a, chutah chuan an indaih ngang lo emaw, chak zawka hmalak pui turin YMA (NGO) chu sawrkarin phungbawmah a sawm zawk tur ni awm tak a nih laia YMA-in hma an la mauh mai (initiate) hi chu sawrkar tan tlawm thlak tak a ni.

Tin, Chief Mi­nister-in “Drugs avanga man te an tang rei thei lo, kan ukil lamte pawh hian drugs vanga thubuai neite hi chu pui lo se...” tih lam hawi a sawi te kha chu zialo tak a ni. Sawrkar hotu lu ber a ni a, hman hmanah khan drugs hmangsualte hremna Dan khauh tak Assembly-ah ama hovin passed se engah nge ukil ho chuan rei hrem loa an chhuahtir tehlul ang ni?

Pi Lucy Lalrinthari Judicial officer-in nikum hmasa lamah DDK programme-ah kan sawrkar hotute drugs chungchanga hremna Dan khauh zawk siam turin a ngen tawh nghe nghe kha. Kan Bible chuan “Roreltu in taima takin rel rawh se” a ti. Kan sawrkar hrawn tawh reng reng hian kan ram tana ṭha tur Dan thar an siam hi sawi tur alawi ala awm lova, budget huam chhunga an sum hmuhna tur lamah erawh chuan an ṭang huai thei hlawm hle lawi si.

Kawng (road): Pu Lal Thanzara, Minister-in “North East-ah Mizoram kawng a ṭha ber” a ti ngam te hi aw... Kan ram kawng chhiatzia hretute chu mipuite hi kan ni. Kan ram hruaituten hniak phawi hauh lova dawt chiang lutuk an sawi bawl bawl mai ṭhin hian ka rilru an ti na takzet ṭhin. In sawi thiam na’n leh mipui bum nan thu puarpawleng hi sawi sawi hlawm tawh suh se.

Hemi chung­changah hi chuan Pu PL Liandinga thu ziak August ni 9/2017 (Nilai Ni) kha ring mai teh ang.

CAG report: Mi­zoram sawrkar, Accounts & Trea­suries, Audit Section-ah kum tam fe thawk ve tawhin sawrkar deptt sum hman dan fel lo engemaw zat audit-naah pawh ka tel tawh a, audit chungchangah experience engemaw chen chu ka nei ve. State AG office-in CAG report-a a luh hmain department lamah a dik lo lai nia lang insawi fiah turin ṭum engemaw zat an thawnkir a, an sawifiahna pawm tlak te chu an paih (dropped) sak a, an sawifiah theih thlawt loh, thlitfim fe hnuah chauh CAG-ah an thawn ṭhin.

NLUP chung­chang CAG report-a lo lang Chief Minis­ter-in dawt ang hiala a sawi te, a chhui fiah tur pawl din an tum an ṭhulh leh thu Deputy Speaker-in a sawi te kha aw... mipui min ngai mawl lutuk hi a tha nat thlak ngawt mai.

A chhuitu tur pawl kha din tak tak ta se, engtin tak hma la ang maw tih chu ngaih­tuah tham fe a tling.

- R.Lalchhuanawma Chanmari West