Sum tamna mau/ rua

Covid-19 avangin kan sum dinhmun a ṭhat loh thu kan ram hruaitute'n an sawi ṭhin a, kan Chief Minister zahawm tak ngaih pawimawh em em mau/rua ah erawh sum a tam hle. Kum 2019 hnu lamah ringawt mau/rua atan hian cheng nuai 2,359.46 sen a ni tawh.

Kan CM ngaih pawi­mawh em em a nih miau avangin mau/ rua atana sum kan lo seng hnem a nih pawhin a awmna chin chu a awm tho e. Kan CM hian mau/rua hmanga Mizoram economy chawisan tum a nih thu a lo sawi tawh a, kan economy chawisan phahna tur a nih dawn phawt chuan mau/rua atana senso hi a la tam lo a tih theih ang. Chungkaw tam takin ram hectare khat aṭang ringawt pawha kum 1 ah cheng nuai 4/5 vel an hmuhchhuah theihna tur a nih dawn ngat chuan mau/rua atan hian tun aia tam pawh sen nise a pawi hauh lo ang.

MNF kum 4 dawn an sorkar ta a, sorkarna an chan hlim phat aṭangin mau/rua hi kan CM-in a tuipui nghal hle a, mau/rua chungchang a sawi pawh kan hre hnem hlawmin ka ring. Kan ram mau/rua duhtawk loin, tissue culture hmanga siam, hardenning ngat leiin, loneitute hnenah sem a ni.

Tun dinhmunah mau/ rua hi loneitute zingah hlawkpui an awm tawh em ka hre loa, kan economy a ṭhat phahna emaw, hausak phah an awm keichuan ka hre lo. A hlawkpui ber tura ka rin chu mau/raw ṭiak supply tute an ni.

A hlawhtlinna hmel hmu turin a la hma lutuk, i hmanhmawh lutuk min ti pawh an awm maithei. Mah se, kum 1-ah pawh a nu chen thei a nih thu an sawi ṭhinte ka lo hriat avangin hmanhmawh lutukah ka inngai lem lo. Mau/raw ṭiak supply tur zawnna chhuah hmasak ber aṭang chuan kum 2 chuang a liam tawh a ni.

Mau/raw ṭiak supply tura tender chhuah hmasak ber chu Covid-19 vanglai June 3, 2020 khan a ni a, hemi ṭum hian supplier chuan ṭiak 84,000 a supply a ni. A ṭum hnihna atana tender chhuah pawh Covid-19 vanglai la tih ngam May 7, 2021 ah a ni a, hemi ṭum hian supplier atana thlan chuan ṭiak 1,22,900 an supply a ni.

Tender chhuah ṭum thumna April 22, 2022 ah erawh Covid-19 a ziaawm chho tawh a, ṭiak 3,87,000 supply a ni. Tender chhuah hun han thlir hian mau/rua hi chu Covid-19 pawhin a tihbuai phak loh ti ila kan sawi sual lutuk lo ang chu maw?

Covid-19 vanglai pawha kan buaipui, cheng nuai 2,359.46 chuang sen a nih tawhna hi kan hlawhtlinpui lo a nih hlauh chuan sum kal ral zozai hi a uihawm dawn e mai. Tun thleng chuan keichuan supplier-te bak hlawkpui tur ka la hmu thiam ve lo a ni. Sorkarin chuan mau/raw ṭiak hi lei zel a la tum lehnghal.

Tun term chhung pawha loneitu hausak phah an awm lo a nih chuan, tupawh sorkar leh se mau/rua atan hi chuan sum seng vak vak tawh lo se ka ti hle.

CM thusawi kan enlet hian tun term chhung hian mau/rua hian kan ecnomoy a chawisang hman em lo a nih pawhin, eizawnna atan mai ni lo, hausak puina atana hmang mi eng emaw zat (supplier-te tel loin) an awm ngei turah keichuan ka ngai.

- Malsawmdawngzela Hrahsel