Tun ang huna Health Department kher kher han audit

Government of Mizoram hnuaia Finance Department hnuaia Accounts & Treasuries (A&T) te chuan Health Department in Covid-19 dona atana pawisa an khawih dan chu tun hnaiah hmanhmawh takin an endik (audit) thut a, he audit an kalpui dawn hian an lehkhathawnah chuan hmanhmawhthlak em em (Most urgent) tiin an ziak a, hei hi Finance department aṭangin Chief Controller of Accounts-ah lehkha hi an thawn a, anni hi Health department hmanhmawh taka chhui nghal tura hrilh an ni ta a ni.

Media hrang hrang report ka lo la chhawng den den a, Vanglaini ber hian an ziah hluai ka rin laiin ka rin aiin an ziak tlem a, Zozam Times lamin lian takin Headline-ah an rawn ziak hluai a, a ngaihnawm a, a breaking news hi chu The Frontier Despatch lamin an Facebok-a an dah kha ka hmuh hmasak ber a ni a, social media hrang hrangah chhiar tur a awm bawk a. Chubakah Congress party khan Press Release nen a rawn chhu zui leh bawk a, he Health department audit hi dan pangngai kalpui chu a ni lo deuh em ni aw? Kan ti zui vawng vawng lo thei lova, dan ang thlapa kalpui ni si hian an tihdan hi a pangngai lo deuh a nih a rinawm ta. Tun thlengin titi a la siam chho mek a ni.

In lo chik chuan Mizoram sorkar thuchhuah Information Department lamin an tihchhuahah khan Health Department pawisa audit hi Sports Minister daihin a rawn sawifiah ta mai kha thil kal vel thlir ṭhin chuan mak tiin kan lo thlir ta a. June ni 19 khan Information website-ah chuan https://dipr.mizoram.gov.in/post/sports-youth-services-minister-in-covid-19-enkawlna-zoram-medical-college-falkawn-a-tlawh tih hnuaiah chuan - "Minister Robert Romawia Royte chuan tunlaia Health Department audit chungchangah zawhna tam tak ṭhenkhatin an nei niin a sawi a, tuna audit kalpui lai mek chu concurrent auditing a nih thu sawiin, Finance Department hnuaia Accounts & Treasuries (A&T)-te hi Mizoram sawrkar sum hman dan chhungkua anga audit-tu an ni, a ti a. Covid-19 hripui leng avangin sum la hman ngai lohnaah sum hman ngai tam tak a awm avangin, A&T hian a tih tur dik tak tiin, Health Department te hi a endikpui mai a ni, tiin a sawi. Sports Minister chuan langtlanga sawrkar kalpui mek a nihzia a lan ngei a rin thu sawi bawkin Covid-19 hripui leng vanga sum hman dan audit chungchangah Health Department pawhin Accounting lamah pawh hlawkpuina an neih ngei a rin thu a sawi bawk a ni," - tih kha kan lo hmu ta a ni.

Cabinet Minister zingah pawh a ngho nei, MNF MLA zinga senior, Mizorama Minister hlun zinga mi department thil thleng kha MLA ṭum khat tlinna, Minister of State zingah pawh a senior ni phak si lovin a rawn sawifiah hi a ngaihna hriat a har ta a ni. Sports Minister hi a nêp e, tihna lam a kawk lova, dan naranin Minister-te hian an chan ni lo Department dang hi chu an va sawi tel ngai mang lova, an sawi tel a nih pawhin an sawina hmunah hian chu Minister chu awm velin an infakna lama ni ṭhin tlangpui a ni si a, he thilah hian health Department pawisa audit thu Sports Minister in a Minister tel ve loh naah a sawi chhuak hian Health sum audit hi an vei tlang hle tih a lantir loh pawhin Health sum audit tur hi a nawra nawr luih angin a lantir thei ta a ni. Hei hi Sports Minister tum a ni kher lovang a, Health department hmun ZMC a tlawh avangin a sawi chu a ni ngei ang a. Chutipawhnise, thil hi thlirna chi hnih hi a awm ṭhin a, a lehlam aṭanga thlir chuan Health Minister sawifiah tur anga ngaih kha Minister junior zawkin a sawifiah a, sorkar thuchhuah lamah a lang ta si.

Tunlaiah sorkar office hi an kal dan a la 100% lova, staff hniam lam deuhte chu an la inkal chhawk a ni. Staff indaih loh lai kan sawi dawn chuan tun ang hun aia sorkar hnathawk (Department hrang hrang) indaih lohna hi a awm lem lovang, office pawh an kai kim thei lo a ni. Mahse, Health Department chhui a ngai bawk si. Health Department hi ka hriat ve theih china an buai lai ber hi thlang dawn ila, Covid-19 hri len hun lai aia an buai hi ka la hre lo. A chhuitu lam pawh an buai lai ber leh an chhui tur department lam pawh an buai lai bera "Most Urgent" lehkha Chief Controller of Accounts hnena Finance Department lamin an thawn hi chu a hun lo a awm ngai a nih chuan tun hi a hun loh lai ber a nih a rinawm.

Tun lai hian audit an duh a nih chuan a awl deuha lang Revenue, Sericulture, School Education, Tourism, Environment & Forest etc. etc. hi lo chhui zawk se, a chhui tur department ber an buai lai bera an han audit sawk sawk hi chu, "Ekhai, a pui dawn e, an hmanhmawh hle mai a," tiin mipui chuan kan lo thlir ta mai a ni. Thil dik lo awm lo, dan lova tih awm lovah si hian Health Department an audit dan hi chu a mak ve reuh mai mai a ni.