PL Liandinga tang fan fan

Tahrik 23 (August) Vanglaini chhuakah khan Pu PL Liandinga thuziak kha ka chhiar a, chhuak hmasa lama a ziakte pawh ka hmaih ngai lo. Amah ṭan ru em em chungin, kawng siam hna thawktute duhkhawp lo chungin a tawp thlengin ka chhiar a.

Kawng pawi­mawhzia hi mipuite pawhin kan hre chiang telh telh a, kawng siam sa khuar leh chhiate pawh sum te thawh khawmin hnatlang meuhin kan siam ṭhin a nih hi. Mizoram kawng hi eng vangin nge a ṭhat rei theih loh? Ruahtui tam leh Mizoram lung a chang tawk lo tih hi tun hma aṭangin kan kawngsiamtute chhuan­lam a ni. Tin, kawng siamna leh enkawl zuina tur sum an hmuh tlem thu hi an ṭanchhan a ni ziah bawk.

Mah reng reng se - kawng metal tawha khuar leh chhia a awm reng rengin a hnuaia lung an phah ho (Mizoram lung ngei) chu a la him pul vek zel tho. Kawng siamtu department a thawk hotu liante chuan 'Mizoram lung a chang tawk lo' tiin an insak leh lung rem atan state pawna mi an lalut ngai em? Teuh lo mai, Mizoram lung ngei hmangin in ropui tak tak an sa hlawm a nih hi.

Meidum, Zanlawn, Maubuang leh Keifang daiah te Hydrocarbons zawngin company lian an inbun a; hman deuh khan Minister-in Maubuanga an leiverh a tlawh ṭumin ka kal ve a. Minister chuan a kal hmasak ṭuma an verh tawh ngaihtuahin an verh muan thu sawiin a chhan a zawt a. Company hotute chuan 'Mizoram lung chu a chang lutuk a, verh a har em a ni' tiin an chhang si. MPWD te chhuanlam pakhat nen sawi zawm chuan a inthaichhe tlat nia!

Kan engineer tam zawkte mimal in sak a ropui em em chhung hi chuan kawng ṭha kan neih hmel loh a ni.

Ukraine rama an politician eiruk hmang pakhat chu bawlhhlawh bawmah an paih a, an nem mu lui tlat tih kan hmuh kha! Khatiang anga kan ti ngam lo a nih pawhin, Politician-te in leh thlam ropui tak tak kan tlangzarh sak ang khan engineer-te in ropui thlalak hi an bial chhung kawng nen khaikhinin pholang ve tawh ang u hmiang. Hetianga lepse ngam engineer hi engzat tak awm ang maw?

A thu hrimah kum tin fur laiin kawng chhia vangin kan buai ziah a, mipui kan phun a; eptu party ten sorkar dem nan an hmang tih kan hria.

Kan CM hian PWD hi a enkawl zingah a dah fo a, chuti chung chuan hmasawn tura hmalakna emaw kawngpui ṭha tak nei tura ṭan lakna kan hmu ngai si lo. Ruahtui vanga chhe mai mai thei lo tur khawpa chhah ṭhain siam se; sum an ngah tawk lo a nih chuan sum tam zawk hmu thei tura hmalatu tur pawh anmahni tho a ni lawm ni? Mipui hian em ni an sum neih tlem chu tumsak dawn a?

Ṭha zawka kawng siam a nih theih nana thuziak hmanga hmalatu Pu PL Lian­dinga a mimal ang zawnga bei an awm chuan a beitute hian an mimal ang ṭheuhin lepse an ngam dawn tihna em ni?

Pu PL Liandinga ṭang fan fan.

- Zoramsaia