Nuai 3 semna hre lo 'mawl' min ti maw?

Chiang taka a video nena kan hmuh chu MNF sorkar tirh lam deuh khan Minister pakhat chuan SEDP hnuaiah cheng nuai 3 sem a nih tur thu a sawi mai pawh ni lovin nuai 3 semna tur zawttute chu an 'mawl' ti hialin ṭawngkam mawi lo tak a hmang a. Mipuiin an chhia leh ṭha hriatna hmanga zawhna an zawh chu 'mawl vang' a tihna a ni.

Tunah hian cheng nuai 3 sem thei lotute hi an mawl ta zawk em ni? Cheng nuai 3 tiamtuin sing 2 leh sang 5 an sem chuan a bak cheng nuai 2 sing 7 leh sang 5 sem hun tur kan hre duh a, kan mawl bik lo tih pawh kan sawi ve a hun ta.

Hnam Run ah khan hawi pir vah chung leh MNF ni lo zawng hnuaichhiah chungin Minister pakhat chuan, "SEDP nuai 3 chu khawia mi nge an sem ang le? tihte hi a 'mawl' thlak lutuk, engaah nge kan sem loh ang? Sem kha kan puten an duh chuan" tiin a lo sawi a, a video pawh a awm.

A pute hian sem an duh a, a sem dan tur zawngin an phi ruai a, a sem tur pawisa an nei lo zawk a, sem chu sawi loh sorkar hnathawk hlawh thla chanve vela an pek pawhin 'news' a ni hial tawh, pawisa a nei lo kan sorkar hian. Nuai 3 sem tura min tiamtu sem tur nei si lo hi 'mawl' an awm chuan an mawl a ni zawk lo maw?

Mipui hian kum 2018 inthlan dawn khan nuai 3 hi kan demand reng reng lo. Kan ni lum ai lai te, kan feh kawnga kal laite leh kan inkhawm bang thingpui hang in lai pawha kan ngaihtuah reng reng loh kha tu emaw sorkar duh khan, "Cheng nuai 3 in dawng vek ang," a rawn ti phiar phiar a, Mizo Kristian thutiam chu a dik turah ngaiin a hmaa term hnih kan hnawl hnu kha kan vote ta sup sup a ni.

Chu mai pawh duhtawk lovin, "NLUP dawng tawh zawng zawng pawhin an dawng ang," tih thlengin SEDP hnuaia cheng nuai 3 sem min tiam a ni lom ni kha? Covid-19 hi chhuanlam a thiang lova, Covid avangin central sum tam tak kan dawn ngai reng reng loh tur kan dawn zawk bakah CM Relief Fund ah kan chhung lut ruih ruih bawk. "Covid avangin ek cheh ṭhut reng kan tum lo," tia an hnathawh tam zia mipuia sawitute bawkin Covid chhuan­­lama nuai 3 an sem theih loh chuan tunge 'mawl' chu ni ta le?

Mi 'mawl' rual hian kum tharah hian vote kan thlak dawn asin. Kum 2023-ah hian cheng nuai 3 kan dawng lo a nih chuan mi mawl rual awm khawmte hian kan vote thlakna a dan tawh ang.

SEDP sem theih ring lo mawl min titute hian kan inah vote an rawn la zawng leh dawn. Keini chu kan mawl em avangin mawl min ti lotu lam kan lo hawi tawh mai ang, tiin mi mawl rual hian kan hawi lam kan thlak vaih chuan a tawpah fing deuha vote hmu tlem deuh a awm theih ang tih chu Congress-in MLA 32 aṭanga MLA 5 an neih aṭang hian a chiang tawh a, mipui hian an vote na an thlak ṭhin tih kan hria.

Mipuite mawl titu kan ram hruaitute hi kum 2023 ah kan theihnghilh rual thut hi ka ring lo a ni.

- Lalrinpuia, Ramhlun North