Kan tih ve ṭhin dan hi!

Hman deuh khan Aizawlah pawngsual avangin hnamdang curfew kan puang a, Burma mi hnawh chhuah te pawh kan ti tawh. Sual kan do dan, sual duhlohna kan lantir dan hi a hnam mawl zia lutuk a, tih danglam a hun. Misual kut tuartute an lainatawm a, a thinrim thlak viau. Chutih laiin hnam dang curfew leh Burma unaute hnawh chhuah khan tunah hian thil ṭha zawk a hrin chhuah awm ka hre lo a, hnam dang an ṭit phah emaw an tlem phah ka hre lo a, Burma sorkar inthlak vangin Burma puantahtu an haw duak tih zawng a ni.

Hnamdang curfew puan aṭanga ni thumna velah a nghawng a lo lang a, panhnah awm loh avangin dawrah kuhva lei tur a awm lo tih zawng a ni a, a buai chu keimahni bawk kan ni. Thil dangah pawh buaina tam tak a awm ang. Hetiang thila curfew kan puang kha awm ka ti, mah se sual kan duh lohna kan lantir dân erawh thlâk danglam a ngai.

Police station-ah misual hmel hmuh duh vangin buaina kan siam a, pawi kan khawih bawk ṭhin; Mizo mipuite chet ṭhin dan hi thluak fim takin ngaihtuah teh u, mahni inhrem/ mahni mawng hlim mai kan ni. Thinur sosan laia bandh puan leh ngawt ṭhin te hi buaina chin fel dan ṭha ber a ni lo e.

Hmanah Chakma-te dinhmun tur kan siam sak thlap hnuah kan buai leh mek a, a tira keimahni dan siam ngei-ah kan talbuai leh hnuhnawh a ni! Uluk taka thil ngaihtuah hi kan mifingte pawhin an tlakchham mek a ni a, tunah kan tuar mek.

Mizo rilru nghet lo, ngaih­tuah tawi leh mahni nihna anga lang ngam lo khawpa dawihzepin pawi tam tak a khawih hnu leh kan lo fin tak hnu hian fing takin buaina leh harsatna hmachhawn ṭhin tawh ila, nghet takin i kal tawh ang u.

- Vohbika pa