China hnuaiah maw?

Mizo tam tak hian India sawrkar hnuaiah hian kan hnam leh sakhua hi a him lo riau nia hriatna kan nei ṭhin. Hnam chak lo chu eng sawrkar hnuaiah pawh awm se an him tak tak lo, hnam chak lohna hnar chu intodelh loh hi a ni. Midang aia kan thawh chhuah a tlem chuan hnam chak lo chu kan ni mai.

Chakma issue-ah pawh hian mi tam tak chu China sawrkar biak a, China sawrkar thuhnuaia awm hreh lo ni hial awm ang an tam. China hnuaiah kan him an ring a ni.

Mi hnuaia kun tum reng mai, eng emaw hleka awpbettu dang zawng ruai rilru hi a kutdawh rilru mah mah lo maw?

Heng, awpbettu dang zawng ruaitute chhuanlam pakhat chu, Mizote hi Indian kan nihnaah kan tui hleithei lo tih hi a ni. Kum 1947 aṭanga chhiarin kum 80 thawthang Indian kan zir chung pawhin kan thinlung a Indian hlei thei lo a ni a, chutih laia Chinese nih han zir ṭhat leh tur chu a huphurhawm viau ang a?

Mizo-te hi China aṭanga thlangtla kan ni, mah se kan rilru a Chinese em? China sawrkar hnuaiah kan hnam leh rinna a him ang em? India sawrkarin min kuang­kuah ang hian Communist sawrkar hian min kuangkuah ve thei ang em?

India sawrkar hnenah, "Kan chunga dik lo taka in tih chuan China sawrkar kan bia ang" tiin India vaukhanna atan kan hmang duh a nih erawh chuan thuhran ni se, China hnuaia beh chak hrim hrimna leh China hnuaia intukluh chakna rilru kan pu reng reng a nih erawh chuan hnam boralna tur a ni ang.

India sawrkara kan rilru a ngheh theih loh chhan chu kan intodelh loh vang a ni. China hnuaiah pawh awm ila hetiang reng kan nih chuan tuna India hnuaia kan chan ai hian kan chan a chhe zawk viau mai thei.

India hian min ngaimawh ve theihna tur khawpin eng emaw tal tharchhuah/ siam chhuak ve ang u, China ringawt han vauchher chu a ropui lo em mai.

Hnam dang an nih chhung chu chawm hlawm kan nih ngat phei chuan kan hnam hi eng hnam hnuaiah mah kan him lo a. Harsatna kan tawh apianga belh tur zawng chung lo hian intodelh tum zawk ang u.Min awptu rama midang aia kan thawh chhuah a tlem bik em em reng chuan khawi ram pawhin min awp se kan tlang tla thei chuang lo ang .

Mahni kea ding ngam tur khawpin thawk ang u. India awp ni mah ila kan intodelh chuan India awpbeh kan ni lo ang, kan intodelh chuan rahbeh kan ni lo ang a, Chakma vang mai mai a 'China' tih ṭuah hum a ngai tawh lo ang.

- J. Lalramnghaka (Jeru-a)