Open letter to therhlo

Duhtak Therhlo,

Hlaphuah thiam ni ila, “Aw Therhlo duhawm, i sakhming a mawi chuang e,” tiin nangmah fakin zaiin l^m ila, ka mal ṭan hauh lo vang. Ka thu leh hla min ṭawmpui a, min lampui a, a khat tawka ‘Hallelui” au-rawl pe tur hi veng tinah hian khaw te r<n tham zet patling ṭhankin tawh hlir an awm fur asin! En teh, Lal muala Munga te, kan kohhran mihlim kumhlun Hrangi te, Tuikhur venga Hranga te lai lai saw a lam uar uarah an ṭang ngei ang tih ka chiang. Chutiang khawp chuan kan khuaah hian i lar a, i tl^ngtla tak meuh a ni.

Chutiang taka lar chu eng nge maw i nih le? I nihna hi zir tham tak, zir tl^k si loh a ni hial lo maw? Lo kan nei a; buh kan ching a; chu chu kan chaw pui ber a ni. Chaw tak tak tling si lo khaikhawmna chu nangmah hi i ni a. Nang ringawt buaipuitu chuan hawpkhawp thar lovin, chaw tak tak a tlachham ṭhin. Hetiang hi i nih avangin, kum sanghnih kal taa kan Lalpan, “Chaw dangral umin phe phe suh u,” a tih, ‘chaw dangral’ zingah khan i tel ve ngei niin a lang. Tel ve satliah pawh i ni lo, a lailum luah, a hotu ber i ni hialin ka hria. Chatuan nunna min thlen thei lo mai ni lo, dam chhung daih nunna pawh min thlen thei lo i ni a. Diktak chuan kan chhungkua leh kan khuaah hian lar viau mah la, hmasawnna tak tak min thlen lo. Chutih ahnekin hmasawnna i dal tlat ṭhin a nih hi. Chuvangin, nang hi chu ‘hmasawnna r^l’ tia koh tlak i ni.

N>p viau mah la, kan iai phal lo che. Kan retheih vang a ni. Mahse hei hi chhuanlam a tling chiah em? Miin retheih chhuanlamin rukru se thiam i chantir ang em? Chu mai a ni lo ve; kan retheihna remchanga hmang a, nangmah rawn tawktarhtu hi keini aiin a demawm zawk a ni lo maw? Retheihna aiin hmalam hun thlir thiam lohna te hi kan mutan lian tak a ni bawk. Hma lam hun kan thlir thiam lo va; thlir thiam turin kan ngaihtuahna kan hmang thui peih si lo.

Kan ngainat chhan che chu maw, chhuanlam dang han sawi kual chiam mah ila, mahni hmasialna hi a ni ber awm e. Nang hi chu e, ka iptea lo l<t, ka chhung leh khat ro bawm te tak tea lo l<t i nih tlat avang hian, kawngpui ṭha tak aiin ka thlang zawk che a. Kan khaw kawng hi chhe viauin, a sawh-gear hlir ni mah se, nang kan neih dawn che chuan kan pawi ti teh chiam lo va; kan vei hek lo.

Hman aṭang tawh khan, power supply ṭha tak neih theihna tur aiin nangmah hi ka thlang zel ṭhin che tih i hria e. Nang ngei hi ka thlang ṭhin che tih i hria a; nangmah chauhin i hria a ni lo, mi dang pawhin an hria. An hriat tlat avangin power supply hnianghnara neihna lam min hlui lovin, nangmah ngei hi min rawn hlui a; tichuan, i malsawmna dawngin an kutah ka thinlung, ka rilru leh ka chhia leh ṭha hriatna ka dah hmak mai a ni. Anni an lawm a; kei ka lawm bawk a. Kan kawng erawh chu a chhiat phah ṭhin a ni mai thei. Kawlphetha lamah hma kan sawn lo a ni mai thei; ka hriat phak loh thil a ni.

Aw, therhlo ropui, i n>p tehlul nen i va ropui em! I hoh tehlul nen i va hlu em! I daih rei loh tehlul nen i phuar a va na em! Nang hi mihring nihna tak tak, mahni hmasial a nihna hre chiangtu i ni a; mahni hmasial a nihna remchanga hmang thiam ber i ni bawk. I zarah, kan chhia leh ṭha hriatna te hi hralh mai mai theih a lo ni ta.

Aw therhlo, i thiltihtheihzia hre chiangtu apiangin lalṭhutthleng kailawnah an hmang ṭhin che a. Chu kailawna awlsam taka lawn kaitirtu chu kei hi ka ni e, nang ka hnawl phal loh che avangin!

Tu nge mamawh che? Keini mi retheite hian kan mamawh che niin a lang. Mahse keini aimahin kan mi lian leh mi lian nih tumte hian an mamawh zawk che asin! Ngaihtuah chiang tak tak se chuan an zak ve ngawt ang. Awm miah lo mah la, keini hi kan thi dawn hauh lo va, kawng dang dapin damkhaw chhuahna kan zawng mai ang a. Awm miah lo la tun ai hian kan taima ang a; hna kan thawk nasa zawk ang a; kan tuar pawh a fei zawk bawk ang. Chu chu hriain nang mamawh lo chea kan awm hi mi lian leh mi lian nih tum apiang hian an hlau a. Nang mamawh tlata inhriatna rilru kan neih reng hi an duhthusam a ni. Chu chu an tan lalṭhutthlenga inhlankai theihna kawng niin an hre tlat a ni. Chutiang mi chu chhuan thar lo awm tur hian an dem lovang em ni? An va dem nasa dawn tak em!

Kan thinlungah hian khua­rel min pek zalenna a awm a; duhthlang tura zalenna ngei chu. Chu chu ramsa aia mihring kan ropuina a ni. Nang erawh chuan hnawk i ti em em a. I n>k a; i bum a; i sual a; vanduaithlak takin i chak ṭhin. A va han manganthlak tehlul em! Engtikah nge nangmah aṭang hian ka fihlim theih ang?

Nangmah aṭanga zalen tur leh fihlim tur hian eng nge ka mamawh? Taimakna, huaisenna, tumruhna, tei rei peihna, mahni inrintawkna te a ni lo em ni? Chung thilte chu ka ban phak maiah hian khua­rel ngei chuan min chhawp­sak a ni lo em ni? Ka ban phak maia mi chu la ngam turin entawktlak hruaitu ka mamawh tel a ni lo’m ni? Aw, mi rethei ka va ni tehlul em! Tu nge min chhuah zalen ang le?

- Lalchhuanawma Tochhawng