LÂWM TUR NGE LÂWM LOH TUR?

Kumin June ni 24, 2022 khàn Mizoram Police te chuan ruihhlo an man hâlral rûnpui an nei a, chutah chuan ruihhlo kg 930.229 hâlral a ni. Hei hi International market-a chhûtin Rs 23,62,09,40,245 (Cheng vaibelchhe sanghnih zathum sawmruk pahnih, nuai kua singli, zahnih sawmli leh panga) man hu zet a ni. Hei hi khawvela ṭum khata ruihhlo hâlral tam ber a ni a, hemi bakah hian nungcha, dân lova tawlhrûk 468 zet man a ni bawk a, chung thil pahnih avang chuan Mizoram Police te chu hnathawh ṭhat chawimawina pêk niin an chanchin chu "World Book of Records 2022 Gold Edition" ah chuantir an ni.

Mizoram chuan khawvel pumah World Record kan siam tihna a nih chu. Chief Minister pawhin Mizoram Police te hi lawmpuina thingpui a inpui nghe nghe.

Mizoramin World Record kan siam ve hrim hrim hi kawng khat ngaihtuah chuan a lawmawm a, kan Police te chhuanawmzia leh an fakawmzia lanna a ni hi a lawmawm. Kan Police te kan chhuang a, hma lam pan zel turin duhsakna kan hlan a ni.

Chutih ruala ngaihtuahnaa lo lût nghal erawh chu keini ang ram tereuhte, Mumbai slum area (dharavi) a chêng pawh zát lo zing aṭanga hetiang zata tam ruihhlo man a ni hi lâwm tur nge lâwm loh tur tih hriatthiam a har. World Record kan siamna hi lâwm tur nge lâwm loh tur tih thlengin min ngaihtuahtir. Heti tak maia kan ram chhûnga ruihhlo a hluar rei ta hi a manganthlak ta hle.

YMA ang zawng te, Sawrkar ang zawng te, kohhran ang zawng te, tlawmngai pâwl hrang hrang ang zawngte pawhin kan do a, "Ruihhlo do kum" kan puan tawh zozaite kha ngaihtuah chuan World Record siamna tham zet mai kan lo la paipawn hi a zahthlák a, kan thalaite hmakhua ngaihtuah phei chuan hmulthi a ding ur ur thei hial a ni!

Ruihhloin kan ṭhalaite a suat nasat tawhzia te, kan khawsak phung, vantlâng leh chhungkua thlenga a nghawng thui dan hi inhrilh nawn fo ngai loin kan sawi a, kan inhrilh a, kan hmu a, kan entir chamchi a. Chuti chung chuan ruihhlo hi kan ramah hian a hluar êm êm reng mai hi a mak ngawt mai! Nge, ruihhlo tawlhrûk hi a hlâwk em avang leh 'thluaka sum lut' natna hi kan vei thûk tawh em avangin mihring a khawih chhiat lam ai chuan kan kuta tangka phêk lût tur lam chauh hi kan chhiar zawk tih palh mai te pawh a awl rum rum ta hial mai.

Ka ṭhalaipui duhtakte u, ruihhlo nghawng natzia hi ngaihtuah ila, hawh u, ruihhlo hi ṭhiana siam lovin i do tlat ang u. Ruihhlo dâwia âta awmte tân hian chhuah leh mai hi a awlsam tawh lo. Aiâwt ang deuh a ni a, a luh chu a awlsam a, chhuah leh erawh a har. Ruihho hi setana bumna thang hlauhawm berte zinga mi a ni tih i pawm ngam ang u. Hua ila, bansan ngam ila, kan mualpho dawn a nih pawhin mualpho huamin i kalsan ngam ang u, nakinah kan la lâwm zawk ang.

Khawvel duhawm takin a hmuak che u a, in hmaah hian hlawhtlinna leh hlimna, hringnun duhawm tak takin a hmuak che u, chu kalkawng chu ruihhlo hmangin tichhe lul suh ang che u.

A rûka ruihhlo tawlhru ṭhinte u, sum leh pai lama in vûm thur thur lai khan mihring nunna engzat nge in tihchhiat tawh in ngaihtuah ngai em? Ṭhalai duhawm, thluak ṭha leh fel, ram leh khawtlang, kohhran tana mi chhuanawm tak la ni tur hi engzatnge thlanmual lamah in nawr liam tawh in ngaihtuah ngai em? An thisen mawh hi in phur ngam ang em? Kan ram hmelma in ni a, in Mizopuite tichhetu mai in ni e. Khawngaihin ruihhlo tawlh hi bânsan ula, retheih huamin kalsan ngam ula, tichuan vân Pathian khian a vân malsawmain a umzui ang che u.

Ruihhlo man tam lama Mizoram ang ram te reuhtê, mihring tlêm bawk siin khawvela a ber kan kâi ta mai hi kan police te chhuanawmna piahlamah hian kei zawng ka ngaih a ngam thei ngang lova, kan hmabák ka ngaihtuah hian ka lâwm ngam chiah lo ka ti. Hawh u, ruihhlo hi mitinin tihtakzetin i do teh ang u.

"A tûr a nâ e, zungzam a fan zo,

Rawlthar dawntuaite, a dâwi â mek che;

Nangma tan a pawi lua, i dâwn kim lo a ni,

Aw..aw..Mizo tlangval, famkhua i lawi dawn e,

Sim rawh, bansan la, ruihhlo i hmelma a ni.

Aw, tang fan fan!"

- Lalsangzuali Sailo (L)

- PC Nghaklianmawia