Sapṭawng chungchang
Vanglaini 16th Aug. 2017 issue a Milton-an Sapṭawng chungchang a rawn ziak kha tha ka lo ti hle a. Sapṭawng hi kan pianpui ṭawng a nih loh avangin a dik lo deuhva hriat leh hman pawh a mawh love.
Chutih lai chuan kan milian leh mithiam tam tak pawh hian grammar lam chu sawi loh a lam rik dan hi an hmang dik lo nasa ve hle mai niin a lang.
Media announcer te ngat phei hi chuan English thumal zo ṭawng ang maia kan hman lar te hi chu lam dik hram se a ṭha khawp ang. Chutih laiin anmahni English mite ngei zingah pawh lam dan inang lo an awm ve nawk mai.
A bik takin zirtirtu ten a lam dan dik lova naupang an zirtir te phei hi chu ram leh hnam tana thil pawi a tling. Tichuan, lamrik dan dik kan hriat theih nan English thumal kan hman zin si lam sual zin deuh te a lam dan dik i lo thlir lawk teh ang, a dik teuh thei ang berin Mizo ṭawngin lo dah dawn ila:-
Thumal Lam dan tur Thumal Lam dan tur
Career Khêrar Dowry Dauri
Bridge Brij Divorce Divors
Bear Bêr Financial Finansh’ll
Calculator Khalkiuleitor Foreign Forin
Captain Khapṭ’n Front Franṭ
Cabbage Khabij Fruit Frut
Courage Kharij Glove Glov
Data Dêita Journalist Jarnalist
Director Direktor Legal Ligal
Dove Dav Lettuce Letis
Onion Anian Special Sphesh’ll
Oven Avn Regular Regiular
Non Nawn Stadium Steidiem
Social Sosh’ll Walk Uok
A dang pawh a tam mai
Zofate hian Sapṭawng hman hi kan tim deuh tlat ṭhin a, zir zel ila tim loin hmang zel ang u. Hnam dangte chuan 'broken' tak tak pawhin an hmang bawrh bawrh a, an sawi duh a hriat theih tho a, a ṭha hle a ni.
Underground a kan awm laiin kan MP Pu Thanghuta nen chuan Sapṭawngin kan inkawm ṭhin a. Nikhat chu Lal Isuan mipui sanga a hrai thu kha kan sawi a, a sawi dan ka la hriat reng chu - 'In the five thousand public meeting, zizas Krai khilai two fish and faifi roti' a ti a, a hriat theih tho mai a, a ṭha hle a ni. Shillong a lehkha kan zirlaiin Mizo nu pakhat chu a fanu in enge a tih ṭhin tih an zawh chuan, 'Typis a zir a, pis pawh a pis chak ve viau tawh' a ti a ni. Hetiang ṭheuh hian hmang huai ngam ila chuan Sapṭawng a ṭawng thei lo kan vang khawp ang.
- Lalhrima Sailo