MAHATMA GANDHI SIPAI TAN THU

Remna palai changchawia tharum hnawl ngam, India Independence sual chhuaktu Mahatma Gandhi-a kha hmelma beiin indonaah ral kapin, thih buaih buaih te pawh a lo hmachhawn ve tawh a ni tih hi mi tam tak chuan kan hre kher lovin kan ngaihtuah ngai lo maithei.

Mahatma Gandhi, ‘Father of the Nation' hi ṭum hnih zet ral ramah a lo fehchhuak tawh a, huaisen leh ral rama hnathawh ṭhat man, tangkapui (medal) pawh ṭum hnih a dawng.

Tum hnih indona-a a kal hi, reilote te chu ni mahse, a thil hmuh leh tawn hriat hian a rilru luahtu ber, ‘Mimal Zalenna mitin tan a ni tur a ni' tih hi a ngaih­tuahnaah a len phah hle.

Gandhi-a hunlai khan South Africa (tuna Republic of South Africa - RSA) khu tuna Sorkar pakhata awm khawm an ni lo. Kum 1893 vel kha chuan State pahnih, Natal leh Cape Colony te chu British Colony an ni ve ve a. Heng British Colony-te bakah hian hmar lamah Independent States pahnih Orange Free State leh Transvaal, (Boers Holland, Kance, Germeny aṭanga pemkhawm) an awm a. Boers hi Dutch ṭawnga loneitu ‘farmer’ tihna a ni. Heng British Colony leh European pem khawm karah hian intihbuaina awm ve ṭhin mahse, an in sumdawn tawnna lam chu a kal reng tho ṭhin.

Gandhi-a, India aṭanga Durban (Natal) a thlen hian amah siamtu, Abdullah Seth hian sumdawnna lamah hma a laksak a. Kum 1899-a Boer war an tih mai, Boers leh British indonna-ah hian Gandhi chu a duh vang reng ni lovin a boruak chuan indona lamah a hrual lut a. A thinlung tak chuan a rama lo awmsa (Boers)-ho a ṭan a, British khua leh tui a ni lawi bawk si a, a rinawmna chu British lal lamah a keuh thlu lo thei bawk si lo.

Discipline hnuaia sei lian Gandhi-a (Bapu-a) chuan hun rei tak he Indona aṭang hian a in la hrang thei bik dawn lo tih a hre ve bawk. Hemi hun aṭanga kum 20 hnuah Non-Cooperation movement, British sangawizawnpui duhlohna movement hruaitu ber a ni ta reng a ni. Hetih hunlai pawh hian Bapu hian British rorelna kha a awmhmun aṭang chuan a lo do reng tawh a, mahse he indo Boer war-ah hian chuan Boers-ho ṭan viau mah se, British-ho kha dik zawkah a ngai ve mai niin a lang. Chu mai piah lamah British Colony, British Sorkar hnuaia awm a nih vang pawh khan ṭhahnem a lo ngaih pui ve satliah mai a ni thei bawk.

British rorelna dikna, dawhtheihna te chu a ngaih dan nen a inrem viau a, British-ho a do chhan ber erawh chu, India mite dikna chu British-te nen a inang lo lai hi a ni ber awm e. Chutih mek laiin mipuite pawhin roreltu-in a phut chu an pekir ve tur a ni tih hi a ngaihdan tluangtlam a ni fo ṭhin. Chutichuan Bapu-a chuan theihtawp chhuahin Ruangla pawl "Stretcher Bearers Medical Battallion" mi 1000, indonaa hliam enkawl tur leh ruang la turin a din ta a. A tirah chuan British Commander-te chuan Gandhi-a Ruangla pawl chu dan angin phur lem lo tak chuan an pawm naran a. Mahse Boers-ho in an nawr nasat tak zelah chuan, British sipai thi leh hliam an pung chho zel a, British Commander-te chu Bapu-a ruangla kutah an innghat ta ringawt mai a ni.

Bapu-a leh a hote chuan silai mu karah hliamte chu Hospital-ah te an zawn lut a, a chang chuan mel 20-te mel 30-te ke in an kal ṭhin. Amah Bapu-a sawi danin, "Indian Ambulance Corps mi 1100 Boer Indona-ah ka mawhphurhnaah an awm a. Heng Calenso, Spoinkop leh Vaalkranz operation-ah te hian ka tel ve a, General Buller in Special Mention-in-Despatches min pe" a ti. Mention-in-despatch hi British Sorkar-in indona-a mi huaisen leh hnathawk ṭha te a pek ṭhin a ni.

1906 Zulu Rebel: Boer war zawh hnuah hian South Africa pumpui chu ram khat rorelna hnuaiah siam a lo ni ta a. Indo zawh tawh hnu pawh hian hmun ṭhenkhatah intihbuaina leh helna-te a awm fo a ni. Mahse ram awptuten hneh takin an beng dai mai zel a. Kum 1906 khan Zulu ho chu British awpna lakah an hel a, he helna hian South Africa ram pum pui a tuam a. Bapu-a khan British rorelna kha mipuiah a tla rualin a hria a, mi hnuaihnung zawkte tan chhenfakawm niin a hria a, chuvangin lalber, a dinhmun derthawn laia ṭanpui chu a tihtur dik tak niah a ngai hmiah mai a ni. Chuvangin, Medical Contingent, indonaa hliam enkawl tur leh mitthi ruang la turin a mite hruaikhawm hna a thawk a ni.

Ama sawi danin, "Sipai pawl, awmhmun nghet nei lo, insuan reng zingahte min dah a, anni Sakawr chungah an chuang a, keini ke a kalin, hliam zawnna hlang ‘stretcher’ pu chungin kan zui a, ṭum thum emaw ṭum li emaw chu mel 40 ke in kan kal" a ti. Hetia thla khat zet indonaa an awm hnu hian Medical Corps chu an ti tawp ta a. He Medical Corps member zawng zawng hi 'Special Medal' British Sorkarin a pe a, Gandhi, Sgt. Major (Bapu-a) chu he chawimawina tangkapui bel zingah hian a tel ve a ni.

- Lt Col ZS Zuala (Retd) Source : (Sainik Samachar issue  29 September - 6 October, 1991)