Traffic jam vanga kan manganna a bo dawn ta!

Kumin December ni 1 chu ka va nghak­hlel tak em! Krismas leh kum thar pawh a nuam tawh ngawt ang. Engatinge? E le, Aizawl traffic jam nasa lutuk hi sorkarin a chingfel vek dawn a, nikum October ni 1, 2016 aṭanga ni 426, kum khat leh thla hnih zet kha lirthei chitin, two-wheeler leh road roller ang chi zawng zawng tiamin garage (a dahna - mipui kawng tana hnawk lova dahna) nei vek turin hun tam tawk a pe a. Sorkar motor, car, earth mover etc., pawh a huam vek a ni. Lirthei neitute’n a remchang lai apiangah garage an sa han hmuh hian sorkar thu hi an awih hle dawn tih a lang reng mai a, a va lawmawm tak em!

Aizawl lirthei tam lutuk vanga harsatna kan tawh zingah Mi­zoram Pollution Con­trol Board (MPCB) ngaihdana lirthei khu chhuak (pollution) boruak tichhetu hi a lo sang ve ta viau a lo ni. Hei hi mihring hriselna tichhe theitu, chuap leh taksa organ dang tichhia a, harsatna tam takmin thlentu a ni, an ti.

Traffic jam ber a awm tawh loh chuan Bawngkawn aṭanga Kulikawn chu minute 20 vel lekah kan thleng thei dawn a ni, a va nuam dawn em! Petrol a hek lo dawn bawk si, hmanhmawh thilah kan vak kual zung zung thei dawn a ni.

Aizawlah hian lirthei neitu aiin mi satliah, lirthei nei ve lo hi kan tam daih zawk a. Lirthei khalhtute pawh an hawihhawm viau tawh ang tih ka beisei. Kawng lai taka din tlat mai te, hnunga kalte ngaihtuah miah lova rei zet mi biaa din te pawh kan sim tial tial ka beisei.

Keini ang lirthei nei ve lo tan chuan duh hun hunah, khawi hmun aṭang pawha Taxi koh theih tura UD&PA leh Ola Company-in Aggregator role nei tura an hmalakna hi a hlawhtling hman turah ngai ila. Car neite pawh hian ‘Parking’-ah harsatna an neih fo avangin driver nei pha chin officer ni lo tan phei chuan Aizawl-ah hian car hawl chhuah ngam pawh a ni ta chuang lo bawk nen! Hetianga zanlaiah pawh, zing varṭianah pawh koh mai theih Taxi service kan neih theih chuan car nei ve lo tan chuan car nei ang tho kan ni ta a, tuna car man ka lo tuak ve pawh hi kawng dangah ka hmang daih dawn!

Sorkarin thil ṭha a tih dawnin dodalna a awm fo a. He Traffic Jam Free Aizawl Policy ṭha lutuk pawh hi lirthei nei tlem te emaw Political Party, tuna sorkarin an thil tih ṭhat avanga mipuiin kum 2018-ah an vote sorkar leh hlau tlat te chuan an dodal leh maithei. Hetah hian hei hi i chiang ang u khai; lirthei nei aiin nei ve lo hi kan tam zawk daih. Hausak vangin democracy-ah duh ang angin miretheite a thunun ngawt theih loh. Kawngpui hmangtu, mipuite hi ṭangrual ve ila, dodalna awm apiang chu eng kawng pawha sorkarin hma a lak chuan i thlawp tlat ang u.

Aizawl traffic jam hi tu tan pawh a hnawksak a, ui tur pakhat te mah a awm lo, huai takin sorkar i ṭawiawm ang u. Traffic jam awm lohna khawpui din turin a mi chhe ber pawh kan ṭangkai dawn e. Tunah garage la nei lote’n ni 90 zen zawn garage siam nan hun an la nei e.

- Lalhruaitluanga Bawitlung