ENGTIZIA NGE LUNGLEI KAWNG HI A CHHIAT EM EM BIK?

Rawngbawlna avangin hun eng emaw chen chu chhim pa kan ni ve leh ta reng mai. Chhim lam khaw 100 chuang kan tlawh chhuak tawh. Mipui neksawrna nasa tak kan hmuh thu pawh kan auchhuahpui tawh kha. Hun rei a la ni lo, kan world Bank road kawng kan sawi vul ve em em lah chu, fur khat pawh ni lo, fur chanve pawh a daih lo nia maw le! Leitlangpui khawpui kawng phei chu pui bep bep tak a ni.

World Bank road chu: Aizawl aṭanga Thenzawl chu kum tir aṭang khan a mam ṭha reng mai, Thenzawl kan pel chiah a, a lo bawl tan nghal, a bawl zual chu lung nawiin an hnawh zeuh zeuh, hmun ṭhenkhat chu an lo black top ṭha mek bawk.

March thla kan kai a, kawng bawl zual kan tih kha an lo black top mar zui ta mai, heti a nih chuan a zia ve tawh khawp alawm kan ti a, mahse maw, July thla kan kai meuh chuan, Thenzawl aṭanga Lunglei inkar kawng chu, kawng tluanin a bawl mai ni lovin, kawng tha lai dap chawp ngaia tlan a ngai leh tawh. Kawng mam ṭha KM 1 zawh tur pawh awm lo lekin a khuar chhe phei vek thei nia mawle!

Kawng siamtute hian eng formula nge maw an hman bik le? Aizawl District huam chhung zawng chu a mam ṭha reng bawk si a, Thenzawl pelh chiah aṭanga khuar tam nghal em em thei hian engtinnge an siam thiam zawk tih mai tur a ni.

Kawng foundation ṭha lo chungah an zut mam mai mai tih a chiang, fur chanve pawh tling lovah black top hmel hmuh tur awm mumal lo nghal ringawt hi zawng, a zia lo lam deuh chu a ni.

Leitlangpui chu: Ral khata kan lo hriat ṭhin dan chuan, Lunglei khawpui chu High Power Committee hial nei an ni a, khawpui pawh a ziaawm viau ang chu kan lo ti a. A teuh lo mai.

Khawpui kawng a zim a, zauh theih a ni tawh lo, motor a tam tawh a, park-na mumal a tlem lutuk. Kawngpui zim teah motor park a ngai a, a ti zim lehzual bawk si.

Kumin kum tir aṭangin khawpui kawng a bawl nghal, fur ruah tui tlak hmain an siam dawn emaw kan ti a, kan nghak thlawn. Lunglawn aṭanga AOC thleng a an rawn black top a, an tawp leh thut si. Khawpui kawng lun lai zawng chu, kan insawh siak nghawng nghawng mai chu a nih hi.

Ruah tui a lo tla a, a khuar zual deuh deuh, chauh thu barawhah lung tumin an hnawh tawp mai a, nuih hi a za lo teh asin. Kawng hotupa ka FB ṭhian ka text a, sum in nei nange? ka ti a, fur ruah tui tlak zawhah kan siam dawn, a ti heuh mai. Fur hmain sum hman tur a awm lo nge ni? Fur zawh lama kan siam a, tun ang quality bawka kan siam leh chuan, furah kawng a bawl leh hman dawn tihna a ni. A ulh zawng hian kan che zel mai.

Mipui hi chu min sawp rethei ve ṭhin alawm. Kan sorkar chak tak, tih ṭawngkamte hi fiamthuna ṭawngkam atan kan hmang ta mai mai chu a nih hi.

Ruling MLA rual bial ni ve siah hian, ruling hmel a lang lo chu a nih hi. Leitlangpui kawng cher tak leh bawl tak hi, a mam hun nghakin mipui kan phun mur mur mai a. A siam dan system hi kan thlak thei ang em? Chhim thlipui tlehtir thei khawp hruaitu chak engtikah tak nei ve ang i maw?

- Lalrinliana Colney