Airport chim kha....

Lengpui Airport chei ṭhat mek, kumin March 10 chim ta chu chief minister Zoramthanga'n rang takin a tlawh a, rang taka siam ṭhat a nih tur thu a sawi a ni.

Lengpui Airport chim a tlawh hnu lawk hian, kan airport chei ṭhat mek leh hmalakna hrang hrang tam tak zinga slab chhûn chim pawh PWD official leh Aviation lam hotute nen kan enho nghal. Existing structure stability-te monitor a nih hnuah rang taka siamṭhat leh nghal vek a ni ang, tiin a Instagram account-ah CM hian a ziak a ni.

He thil thleng hi PWD lam pawhin sawifiahna an tichhuak nghal a, slab dona mau pelh vanga chim a nih thu an sawi a, vawiin thleng hian he chhiatna lian tham tak thlenga mawh­phurtu ber hrem emaw hriat tur a awm ta lo hi a mak viau.

Hmun pawimawh tak Lengpui airport sak mek chim chhan tak a hnua an chhui zuinaah khan an hmanraw hman a ṭhat tawk loh thu chiang taka sawi a ni thung.

Lengpui airport chei ṭhat mek chim hi a pawi piah lamah hnamdangten Mizo­ram an lo luhka bera hetiang chhiatna a thleng hi a a mualpho thlak viau a ni. A chhan chu lirnghing leh khuarel chhiatna vanga he chhiatna hi thleng ni se chuan tu pawhin an hrethiam em em ang a, vanduai thil a ni tih pawh an hrethiam ang.

Mahse mistiri association leh chhiatna endiktu tam ber khan hmanrua an hman chhiat vang a nih thu an sawi hlawm a, kha tak kha thil pawi leh zahthlak ber chu a ni.

Lengpui Airport chei ṭhat hna hi kan Chief Minister vua leh vang zinga mi nia sawi Zoramchhana, Electric Veng, Aizawl leh KR Constructions-in an thawk a, KR Constructions hi Kamrul Lashkar (Kamlova Chhangte) ta a ni.

Lengpui Airport hi kan Chief Minister hian a vei em em ṭhin kha a ni a, Covid-19 hripui kan hlauh vanglai pawh khan a khat tawkin airport chei ṭhat hna kal mek hi a tlawh fo tih media lamah pawh kan lo hmu fo a ni.

Chief Minister hmelhriat hnai tak pahnih hnathawh lai kher a han chim te hi a pawi a, Mizoram mipui tana hmun pawimawh leh ualau takah pawh hetianga a chim mai thei a nih chuan, hmun kilkhawr zawka an hna te pawh a rinhlelhawm zo vek tawh a ni.

Airport siam mek chima mawhphurtu contractor te pahnih hi sorkarin a hrem awm kan hre ta miah lo a, a viltu engineeer pawh hrem an nih awm kan hre zui lo.

Heti a nih chuan Mizoram sorkar hnuaia contract hna hi hmanraw chhe tak tak hmanga thawh fo a ngam awm dawn tih a lang reng a, contractor tan hleprukna remchang tak kan siam sak a ni ber mai.

- F. Lalpekhlua Aizawl North