CM FANU LEH DOCTOR BAWK
Kum 3 vel a liam tawh ang, DDK palaiin kuthna thawktu huangah mi pakhat a kawm a. Chuta an thusawi chu -
DDK palai: "Hei kapu huan i nei ṭhain, thei serthlum, lakhuih puitling i ngah riau mai a, a nih leh sawrkar aṭang te hian ṭanpuina sawi tur i nei ve lo maw?"
Huan neitu: "Chutiang ṭanpuina han sawi tur awm pathian zarah ka la nei lo a, ṭanpuitu zawk nih theih hun ka la neih ngei ka beisei"
A la rei lo, nula pakhatin Mizoram doctor hming lar ve tak kut a thlak a. Khami aṭanga kan nihna lo lang hi sawi loh theih loh leh inenfiah ngai chu a ni.
Khawtlang media hrang hrang chuan kha thil thleng kha an ziak nasa a, keini zawkin ni 2/3 vel social media-ah a lang ve a, CM fapa thupha chawina CM ber ni loin an chhungkaw thlalak tarlang telin thupha a chawi ve bawk a. Chuan doctor-te chuan a rualin ni khat badge dum an bel a, chuti chuan thu a tawp a, boruak a dai zui ta niin alang.
Kan sawi tum chu kha thil thleng chungchanga media a thawktu chanchinthar leh a chhuahtu leh chhuah lotu, chhuah loh chhan aṭang khan kan nihna a lang tih hi a ni. Kut thlaktu nula a sual a, doctor-te an fakawm tihna lam a ni lo; kha tih lai media hrang hranga headline a luah loh chhan leh doctor lam pawhin ni khat badge dum bel a an lungawi zui ve mai chhan zawkah khan a ni. CM fanu ni lovin midang tu fapa deppression emaw nei ni ta zawk se, tih te thlengin ka ngaihtuah zui.
Ziaktu pakhat chuan Vanglaini-ah Mizoram media-te a fak thu a rawn ziak a. Khawtlang media hrang hrangin an chhuah chuai chuai laia Mizoram media hrang hrang a luah tlem lutuk chu fakawm a tih thute a rawn sawi a ni. A dik lo pawh ka ti lo mahse hei hi a ni ve bawk thei tih mai a ni e:
1. Thu leh hla a mi huaisen kan awm loh vang.
2. Hlauh kan nei/ engkimah thil an ti thei si a, court-ah pawh. Ka ziah vak chuan chumi act chuan jail bang ka zut palh ang, ka hna suspend/ ban ka ni palh ang etc, ban/ suspend ka nih chuan ka nupui fanaute engtin nge?
3. Sawrkar ṭanpuitu nih tum ai, a zar zo loh hlau reng renga hmanhlel, mahni kutke a din tum lo chhungkua kan tam tlat.
Wordsworth-a meuh pawh hla phuah thiam Milton-a boral ni meuh chuan, "Hmanlai English ho chhuanawmna a bo zova, chhunglam hlimnate kha duhamnain a luahlan zo ta. Aw, lokir leh la, min tiharh teh, nundan mawi te, ṭhatna te, zalenna leh thuneihnate min pe leh lul teh" tiin a chiau vawng vawng mai a ni.
Thu leh hlain thil a tih theihzia chu i chhiar leh hriat tam ang zel a ni mai e. Silai leh sipai chakna pawhin a tuk dawl zawh loh khawpin mihring thinlunghi a ti khauh thei a ni. (RL, Thanmawia)
Thu leh hlain a chawm loh leh ngaihsan loh, ngaihvenna chang pawh hre lo, sum leh pai in leh lo ram leh hnam hmasawnna chu hmasawnna khingbai a ni. Heng hi a thleng duh uchuak bik, eiruk, tualthah, helna, in pawngnekna etc...hmasawnna ken tel mi chimawm te hi chu an pawng tulh tulh ṭhin.
A tawp berna atan chuan, kuthnathawktu DDK palai interview a kan hmuh aṭang khian hei hi a lo lang ta, Mizoram nihna dik tak darthlalang a ni e. Sawrkar chu kan engkima engkim min chawmtu kan nu kan pa a ni tih hi.
Kan faten kan thu an lo awi duh lova ruihhlo, thih dan ṭha lo leh mipat hmeichhiatna hman khawlohna in kan Zoram min luhchilh mai hi dem tur a lo awm lo. A chhan chu kan sawrkar (kan nu leh pa) thu awi kan lo tam lo em a, belte phai thei loah ngaiin chhiah pawh kan pe ṭha duh lova, chu ahnehin a pawisa kan pawngsual hi a ni hawt a. Thawh loh hlawh nen lam kan lo ei nasa bawk tih te hi kan faten an lo hre ve vek tawh si nen, an mak ti deppresion te han nei lo rual a ni lo e.
Khi kuthnathawktu khi chuan anu leh pa (Sawrkar) ṭanpui theih hun a la neih tur thu a sawi - keiin / nangin engnge kan sawi ve dawn le?
- azyuthanga