MNF Sawrkar hian Mizoram mipuite hi a ram awp mipui ang lekin min ngai ami?

Planning Commi­ssion hunlai kha chuan pawisa hman dan tur fel takin Plan leh Non Plan angin an rawn bithliah fel thlap thlap a, amaherawhchu 2014 aṭang khan Niti Aayog chuan Planning Commi­ssion chu rawn thlakin kal­phung an rawn thlak hlawk a, pawisa pawh hman dan tur rawn bithliah tawh lovin state sawrkar kutah an dah ta a ni.

Pawisa hlawm an rawn pe tawp mai a, state sawrkar chuan an ngaih pawimawh dan a zirin pawisa an lo hmang mai tawh a. Hetah hian sawrkar mawhphurhna la thiam leh sum inrenchem thiam leh thiam lo inkar a hla ta hle a ni.

Tun sawrkar ang lo takin Congress sawrkar lai leh Pu Lalsawta Finance Minister a nih lai kha chuan sawrkarin a ṭulah pawisa hman tur a neih reng bakah sum awm loh avanga harsatna kha Mizoram sawrkarin a nei ngai lo a ni.

Bill thehluh ni la la emaw ni reilo te chhunga la thei bik contractor za tel zingah an awm lawi si te hi a lung­chhiatthlakin a huatthlala ta khawp mai. Chutih rualin a aia huatthlakawm zawk chu damlo MR bill a kum telin a tan lai te, sawrkar hnathawk kum telin thla tin mai hlawh a hunbi a an lak theih loh lai etc a an mi ngaih pawimawh bikte tana sum a lo awm hnem thozia hriat hi a ni.

Tun sawrkarah hi chuan mipui tana rawngbawlnaah leh mipui hnena thleng tur sum a awm lo tih reng laiin leh mi tam tak contract bill a tan ṭeuh laiin sawrkar chuan a duhsak zawngte tan chuan sum a lo awm tak zet tih September ni 14, 2022 (Nilaini) a MNF Legislature Party Secretary Pu L Thangmawia hova MNF hotuten press conference an neih khan a nemnghet chiang viau a ni.

Mipui tana hman tur pawisa central lam aṭanga rawn kal leh kan chhiah pek tlingkhawm sum hi a hmanna turah party worker leh contractor te an dah pawimawh hmasa ber a ni tih kha an press conference aṭang khan a ngaih ruat loh theih loh.

Hei hian zawhna min siam ta a, chu chu MNF sawrkar hian Mizoram citizen, Mizoram mipuite hi an ram awp mipuite ang lekah min ngai ta a mi tih hi a ni?!

- Lalhruaitluanga Bawitlung