Beihrual Bonus Siam ṭhat hna!

"...tell these people they don't know something about me!"

- Eminem, 8 Mile.

Pehhel kual leh thup ṭit ṭet vêl remchanlohna hmun, in lipse leh a tak taka a zung chawpa in phoro a ngaihna, 'rap hmanga indona dawhsanah' Eminem khan, "heng mipuite hi ka chanchin an hriat loh han hrilh ta che!" tiin a chhiatna lai leh a lâktlaklohna lai chham chhunzawm turin a hmaa midum palian zet kha a cho khar khar a! Amah Eminem ber khan a chanchin tuihnai lo zawng zawng a phawrh fai vek tawh si a, sawi leh chham belh tur hre tawh lovin kha midum kha a dangawk din ta vel mai mai a nih kha! Indeuhsawhna dawhsanah meuh pawh sawiseltu râwlin ṭangkai loh hun zu nei nia!

Social media lama sawiseltu Indian tamzia hi, Chinese phei chu an tam lehzual ang - Mizo chauh hi kan ni bik lo aw! Zing ṭawngṭai inkhawm bâng nuho vawksa inchuh kan sawi maw - White House-ah Bill Clinton kekawr zipper kha Monica Lewinsky hmaah theh hawn a ni ve tho a ni lo'm ni? Kan tlinlohna lai hi tling lo ve thote hmanga hliahkhuh kan tum lo, teuh lo mai! Ih e, "mipuite hi kaihhruai ngai lo se, hruaitu an awm a ṭul nang!" tih fam ta, Pu RK Lianzuala'n a lo sawi daih tawh tak kha mawle!

Dik chiah, sawiselna râwl kan chhuah a rin poh leh kaihhruai ngai mipui kan nihzia hi a dik nawn leh ṭhin. I lo chîk ve ṭhin tho tiraw? Sawiseltu aiin kawhhmuhtu leh chinfelna hmanrua humtu - ziaktu Rotea leh tlangval Hruaitea te thuchhehin chhiar a hlawhzia hi! Politics tih a rik ruala eirutu hmuia a ei ruk kai berh nuai kan zaa kan hmuh vek chu kan nuih a, kutzungchala kan kawh rawn luih luih chuan mawng min hlim khum a, a zak der lo! Beidawng mipui ngui leh nguai indawmkun chu ziaktu Rotea hian a lehkhabu Thingserh hmangin beiseina min siam a.

Kan hnam hian politi­cian dik leh rinawm, eirukna laka fihlim, District Council hun lai khan kan nei a. Chumi chu Pu HK Bawihchhuaka a ni a, CEM term khat a chelh hnuah mi in hnuai a pan thu te an han sawi thar hlauh mai te khan awmzia a nei.

Chutiang bawkin, khu lama 'down' ve ngai lo ṭhalai entawntlak leh mi chhuanawmte thur chhuak nalh nalhin, amah tlangval Hruaitea Chawngte hian sawisel tur ni lovin, ngaih­santlak min fah ṭhin a nih hi! Sawisel ringawt lovin chinfel leh kawhhmuh tlak phochhuah lama ṭan la he ziaktu pannih hian, tlai ni tla ruai ruai leh thla bial zanin an lunglen a kaih thawh nasat ṭhinzia hlir min hrilhin kur ruai ruai reng se - an hming hi hriat a ni kher lovang!

Tunhnaia thusawi sawi zui hlawh ber pawl, KṬP General Conference neih zawh taka Revd. Chuauṭhuama sermon minute 44 lek te kha a laimu chu siam ṭhat hna a nih kha maw - kan pu hian Mafaa chungchang tih loh hi chu a khak fuh em em vek zel!

Thluak aia kutzungpui hmang rim zawk, sawisel hi chaw tui bera nei te pawh hian kaihhruai an ngai vek tho a nia! Heng ka'n sawi chiam chhan chu - sawiseltu hmui kiangah hi chuan minaran tân hian beidawnna chhum hi a thim chhah phui mup mup a, sanghawngsei tiat zeta lian hi sabengtung mei bul kebai kan ni pha tawk ṭhin! A ni, zawhte zak râng satliah ringawt ni tawh lovin, kawhhmuhtu ṭha kiangah chuan sakeibaknei ianga theihna kan neih te sawrchhuahin a awm a, ka'n rum ve ta ham ham fo a nih hi - he beihrual thla hian hmasawn dawrh zawngin a chhe lai siamṭhat duhna min 'bonus' ṭheuh teh se!

Engtin? Presbyterian lam hian midang kohhran thurin hnial hman khawpa upa zuanzang nei mah se, anni lam hian ram inrelbawlna an pulpit aṭang meuh paw'n an chai ngamna a rei tawh.

Krista Rilru tih beihrual thuzira thlang ngam keini Baptist kohhran leh kohhran dangte pawh hian ram leh hnam a ṭha zawnga nghawng lawih khawpin khawnge 'beihrual bonus' dawng pha law law-in aw ni ang!

- Tpa Bunghai