NAUPANG KHAWMPUI LAIA KA RILRUA LANG ZIAH CHU

Vawiin hi Thawhṭanni a ni, niminah khan Zoram hmun hrang hrangah Kohhran ṭhenkhatte chuan Naupang khawmpui an neiin intihsiakna ngaihnawm tak tak ngaihthlak leh hmuh a ni. Social media lamah video hmuhnawm tak tak leh a ṭhente chu min tihlimtu tak takte pawh a awm bawk a, kan thlir dan erawh a inang vek kher lo mai thei e. Kei erawh chuan heng thlalak leh video clip ka hmuhte hian kumtinin ka rilru a na thar leh ṭhin a, midangin intihsiakna hmuna naupang tu emaw che maksak deuh, ti mai ang, han che danglam deuhte an nuih a, za taka an nuih lai hian keichuan kum tam tak liam tawha Naupang intihsiakna hmuna zak taka ka awm lai kha ka hrechhuak lo thei lo a, kha thil avang khan vawiin thleng hian nuih har ka ti a, ka zak ru leh ngawih ngawih ṭhin.

Kum sawm vel ka ni mai thei e, Khawzawl Bial Sunday School inkhawmpui hi Chawngtlaiah nghah a ni a, a hma daih aṭang tawhin keini chu intihsiaknaa kan tel dawn avangin kan lo zir ngawrh hle ṭhin a. Thu inchhangte, Hlate, Bible chang sawite leh Recitation-te chu hneh taka sawia sa thei turin kan zir ngawrh viau ṭhin. Tichuan, khawmpui kal a rawn hun dawn a, keini pawh kan phur hle a, kan kal dawn zanah phei chuan kan helhhawlh a ni ber mai. Kan ṭhiante pahnih phei chuan Chawngtlaiah chhungte an neih avangin Zirtawpniah an lo va kal hmasa lehnghal a. Keini chu Kawnzar veng aṭangin khawmpui kan neihna hmun tur Chawngtlaiah chuan kein kan kal a, kan inzui dam dam a, a nuam kan ti hle mai. Kan Chawlhni thawmhnawte chu bag-ah akin ute rualin kan kal ve hnak hnak a, kawngkama tui ina kan chawlh laite pawh vawiin thleng hian ka mitthlaah fiah takin ka la hmu ṭhin. Ni a sa ṭha bawk a, bianga thlan tui luang zawih zawihin tlai lam dar 4 velah hian Chawngtlai chu kan lut a, kan ṭhiante pahnih (an hming chu sawi ta lo mai ila) chuan min lo hmuak a, nizana TV an en thute chu hlim takin min hrilh mawlh mawlh bawk a, Biak Ina mikhual min lo hmuah avangin kan zavai chuan kan lut a, chumi hnuah kan thlenna turah min sem darh leh a.

Inrinni zanah chuan tlaia min lo hmuahna hmun Biak Inah chuan kan inkhawm a, hmun hrang hrang aṭanga Naupang khawmpui rawn kalte chu thutna hran ṭheuhah min ṭhuttirin inkhawm ṭan hnuah Chairman chuan inhmelhriat nan min dintir hlawm a, keini ngei pawh chu a rualin kan ding ṭhap a, Kawnzar veng aṭanga kal hi mi 30 vel kan ni awm e. Inrinni zan aṭang hian intihsiakna neih a ni a, hemi zanah hi chuan Senior leh Intermediate Department bik chauhin intihsiakna hi an nei ta niin ka hria. A tuk, Pathianni zing aṭang chuan keini, Junior Department leh a hnuai lamte chuan intihsiakna kan nei ve leh a, hetah chiah hian a ni; vawiin thlenga ka rilru tinatu ka tawn a, vawiin thlenga Naupang intihsiakna a lo thlen apianga ka zah ruk ngawih ngawihna chhan lo thleng chu.

Chu chu hetiang hi a ni a; keini Junior mipate chu panga kan ni a, tlar hma berah kan ṭhu a, Chairman sir ding lamah hian a ni nghe nghe. Lamtual sir mai a nih bawk avang chuan kan langsar viau bawk a. Chutianga intihsiakna kan han neih dawnah chuan kan zirtirtu pakhat hi a rawn kalin ka beng bulah a rawn kun hniam a, "Intihsiakna hunah chuan lo tel ve lo mai la, midang din laiin lo ṭhu ang che," tiin min rawn hrilh a, tichuan ka ṭhiante din lai chuan ngawi rengin ka lo ṭhu a, engmah pawh ka sawi ve ta lo a ni.

Hei hi a chhan min hrilh lem lo a, thuawih tak chuan ka ṭhu mai a. Naupang ta na na na chu lungawih lohah pawh la chuang loin khawmpui pawh hlim takin ka hmang tho a, nimahsela, khami darkar erawh kha chuan ka zak hle mai a, mak pawh ka ti a, zirtirtute thu erawh ṭha taka zawmin ka ṭhu ta hle hle mai a ni. Vawiin thleng hian khatia min ṭhuttira intihsiaknaa min teltir leh tak lohna chhan kha kan zirtirtu (amah pawh ka la hre chiang em em) khan min la hrilh chuang lo a, keimah pawh chuan zawh pawh ka la zawt bik ta chuang lo. Naupan lai hian ka ṭawng fiah lo ṭhin a, miin fiah taka thil an lam rik tam tak hi kei chuan fiah takin ka lam ri ve ngai lo a, chutianga ka ṭawng fiah vak loh avang chuan min teltir ta loin, min ṭhuttir em ni ni ang? tih chu tun hnua kan ngaihtuahna a ni. A dik mai thei a, a dik lo thei bawk. A enga pawh chu ni se la, kha thil thleng kha vawiin thlenga Naupang inkhawmpui neih apianga ka hriatchhuah thar leh ziah chu a ni tlat thung si a, ka zak thar leh a, ka inthlahrung thar leh ziah ṭhin.

Cell Phone aṭanga Naupang inkhawmpui lai thlalak leh video chi hrang hrang ka han thlir a, keimah ang bawka ṭawng fiah lo chunga thu inchhang sawi lai ka hmuhte hian ka mit an la bik a, an vannei bikin ka hre ṭhin. Kei chu ṭawng fiah loh avanga thu inchhang sawi lo tura ṭhuttir kha niin ka inhre tlat si a, kum rei tak chhung kha ka ṭawng a fiah loh avanga nuihzat pawh hlawh ka ni. Amaherawhchu, ka chhungte, ka nu leh pa leh ka unaute erawh chuan ṭawng fiah lo kan nih an hre reng chungin min nuihzat ve ngai miah lo a, thil ka lam fiah loh pawhin an nui ve ngai hauh lo. Chu chuan keimahah mi pangngai phak vea inngaihna min neihtir a, Primary School kan kal lai te, Middle School kan kalte leh High School kan kal laite ngei pawh chuan mi theih ang chu theih ve ngei ka tum ṭhin. Zirna kawngah a ni emaw, thil dangah pawh a hnufual pawlah ka ṭang ngai bik lo.

Tun hnua ka ngaihtuah let leh hian kan chhungkaw inenkawl dan kha a ṭha ber e; chu ka ti hauh lo nain pawn lam boruakah ngei pawh chhungkaw inenkawlna ṭha leh ṭha lo chu a lo hriat bik ṭhin a, ka pa hian dawt sawi a phal ngai lote kha kan kum a lo tam ve deuh tak hnuah hian a ṭhatzia ka hrechhuak nawn fo ṭhin a ni. Naupang Sunday School aṭanga Puitling Sunday School-a min hlankai nia ka tlanbote kha tun hnuah hian ka nu leh pa lo zah turzia ka ngaihtuah ṭhin a, nimahsela khami Pathianni tlaia chhung Inkhawmnaah ka pain min zawh chuan, ‘Phaiah tui ka cheng’ tia sawiin dawt ka sawi ngam chuang hauh lo. Chuvang chuan kan naupan laia ka pain chhung inkhawmnaa min fuih fona leh thu ṭha tinrenga min enkawlna chuan kan puitlin hnu pawhin awmzia a lo neihzia hi ka hria a, kum sawmthum hnuah hian a lo ṭhatzia ka hrechhuak nawn fo ṭhin a ni.

Chuvang chuan a lawm, Naupang Sunday School inkhawmpuinaa intihsiakna hmuna min teltir leh loh tak avanga ka zah ruk em emna pawh chuan vawiin thlengin ka thinlungah hmun chang mah se la, chu ka zah rukna vêk chuan tumruhna min siam ṭhin a, rual pawl loa min ngaihna (nia ka hriat) chuan rual khum duhna thinlung min neihtir ta zawk a, rual khum tumin keimah leh keimah ka infuih fo

bawk ṭhin.