Social media leh vehbûr

Kan naupan lai social media kan hmang pha lo kha a va lawmawm - ni lo se ka tan vehbur an khawn ngun viau mai thei!

Beyblade cartoon film lar lai khan, naupang kha chuan beyblade ṭha ber ber kha an nei fur a, Kai-a ta ang te, Tyson-a ta ang te... Ka pa khan min lei ve duh loin Kaihbu min tuksak a, tu mah khan min tum ngam lo. A sirah ka lo kaih vir ve a, kha lai 'scene' kha thla lo lâ-in, tun angin vawrh darh se, ka beyblade leina man kha tum turin an rawn Gpay luih luih mai thei. A hun lai khan ka zak lo ang, nikhua ka hriata rual ka pâwl chhoh hunah erawh ka zak ang.

Cyber lar lai khan darkar khatah game khelh man chêng 20 te a ni a, chhûngten pawisa hi min pe khât hrim hrim, chuvangin lu meh man kha kan hlêp ta ṭhin a. Dinthar veng lu mehna dâwrah kawlh râwtin cheng 10-in a nawrtir theih a, kan unau pathum (cousin)-in a kawlh râwta mehtirin, cheng 20 hlêp chuan Cyber-ah kan va ṭhu ve ta ṭhîn.

Blazing Yoyo lar laite khan a man tlâwm ber chi ka neih phâk loh ṭum a tam, tuna ka ṭhian ṭhenkhatte anga chhungten awlsam taka an ngen apiang an lei ang maia nun awlsam kha ka ban pha ve tlat lo. Tun hnuah erawh chanchin ngaihnawm a lo chang si a nih hi.

Water Pistol lar lai, 2005 vel khan water pistol ṭha zet zet, lian zet zet hi a chhuak a, an indo ṭhin, ka ṭhiante kha. A leina tur nei ve lo bawk chuan tui bottle chhin compass-a verh pawpin, ka tel ve ṭhin a, water pistol nena an indo kara tui bottle nena hlim taka ka lo tlân ve kha tuna social media Samari Mi Ṭha te hian an hmu lo kha ka va lâwm tak. Ka hlimna kha ka lo hlimpui ve ṭhin em em, kha vang khan alawm retheihna sual chhuah ka tum rûk ve ṭâng ṭâng a, hei leh chen ka la zir ve zêl.

Ṭhiante indo laia silai nei ve loa a mu chhar pâwla ka ṭang te kha aw... Vawi khat kah ve ka dil a, ka kah ve theih nan ka hnungzangah te min kap phawt ṭhin.

Khâng zawng zawng kha tunlai chhanah chuan viral thei vek a lo ni. A viral lo hi ka lâwm, khawngaihna ka mamawh tih khang hunlai khan ka hre lo, mi dang khawngaihna chuang liam kha ka lo mamawh lo bawk. Ka chhungte kha dil ila chuan min pe ve em em ang, mahse, thil ṭul lo leina tura pawisa dil zen lo tura zirtir ka ni.

Kan neih phâk tawkin mihring hi kan nung a, puih ngaihna lai kan tam, ka rilru tê tê chuan, "Chumi chuan pawisa min pe se aw..." tih vawng vawng châng kha ka nei ṭhin, mahse social media kaltlanga vehbûr khawnpui a, ka hmel an pho lang tur ka ngaihtuah hian, kan tet laia social media tun anga a la chak lo kha ka va lâwm tak.

Kan naupan lai khan in chhung khura ka pa chêt dan ṭhinte kha rui chunga ka nu kut a thlâk ṭum a awm. Ka nu kha a pachang em a, na tuar hmel pawh pu loin a thiamnaah pawh ngaihdam a dil zâwk zêl a, ṭhenawmte hriat khawpa ka pa ruiin ka nu a hauh te kha. Tun lai angin social media chu chak se ka pa chan kha a van chhe dawn tak!

Youtube leh Facebook velah, “Mi râwva, hmeichhe kutthlâk ching,” tih te emaw, a duham zual pakhat phei chuan, “Hmeichhe kutthlâk ching pa pakhat phêna thil râpthlâk chu!” tih te emaw a ni daih ang.

Ka pa kha khatiang khawp kha ni mah se, kan mitah chuan a sual lo, a tûk a lo thleng a, kan ngainain ka nu pawn a duat lehnghal em em zel. Ka pa neihchhun a ni tlat a, mi pa te aiin ka pa kha ka duh zâwk tho tho. A ruih zana thil thleng kha chhungkaw thil a ni, vantlang hmuha social media-a pho lan chi a ni lo.

Tun laiah rawih loh social media Samari Mi Ṭha te hi khang hunlai khan awm se, ka pa khan lung in a luh phah maithei. A chan a chhe viau ang, chutih rualin kan chhungkaw chan pawh a chhia ang a, kan mualphoin kan zak hle ang. Social media a awm lo kha keini chhungkaw tan khan a lo va ṭha tak e aw. Chhungkaw ṭhenkhat tan pawh a nih tho ka ring. Khawvel changkang zel hi kan zo lo deuh ni te hian a hriat mang e.

Kan harsatna leh kan mualphona karah hian mi dangten hamṭhatna an hmuh châng te hi a tam a, subscriber an ngah phah lawih ṭhin lehnghal!

- Lalramthanzuala (Tza Ralte)