Finance Minister a hlawhchham lailet der!
Mizoram Finance Minister, Chief Minister ni bawk Pu Zoramthanga hi sum leh pai enkawl kawngah a hlawhchham lailet der a ni. Budget siam laia sum hmuh tura beisei aia tam kan sorkarin a hmu deuh ziah chungin sum hmanna lamah a hlawhchham avangin kan leiba a pung zual zel a. Tunah phei chuan leiba kan neih theih zat bituk aia tam kan ba tawh.
GSDP aṭanga 27.85% chauh leiba neia kal tura policy siam a nih avangin Mizoram GSDP hi, leiba kan ngah theihnan, dik lo taka chhut pun a ni a. GSDP chhut pung chung pawhin tuna kan leiba hi kan GSDP aṭanga 34.51% a ni tawh. Hei hian kan Finance Minister a hlawhchham a, Finance Minister thar kan mamawh tih a lantir chiang hle.
Ka table tarlan a tlar hnuai ber dawttu, actual revenue surplus / deficit tih tlar hian kan Finance minister hlawhchhamzia a lan tir chiang viau a. A sorkar hma kuma cheng vbc 1,699 lai revenue surplus awm thei kha a sorkar tan kumah cheng vbc 1,533-ah a tlahniam nghal a ni. Mahnia finance a enkawl tan kumah cheng vbc 204-ah tla thla nghalin a hnu kum aṭang chuan a deficit zui a nih hi!
Sum dinhmun chhia sawi apiangin Covid-19 vanga sum hmuh tlahniam sawiin chhuanlamah an hmang ṭhin a. Table hi uluk taka kan en chuan kum 2020-21-ah kan hmuh tum kan hmu pha lo tih lohah chuan kum tin kan hmuh tum aia tam kan hmu ziah a nih si hi! Chu mai ni lovin, he table hi enchian chuan revenue expenditure a san chak lutuk avangin kan sum dinhmun a chhe chak hle tih chiang takin a lang a nih hi!
Thui tak ziak lovin, a duh apiangin mahnia kan hriatthiam theihnan heti hian ka’n ziak zeuh ang e-
Kum 2017-18 (table-a lang ang hian)-ah hian kan sorkar chuan revenue receipt tia sawi, puk ni lova sum kan hmuh theih tura a chhut chu cheng vbc 8,173.30 a ni a. Hlawh leh inrelbawlna senso-a sum hman ral tura a chhut chu cheng vbc 6,386.21 niin chung sum hman hnua pawisa chuang awm thei tur, hnathawhna tur awm tura a chhut chu cheng vbc 1,787.09 a ni. Chuan, a takah erawh chuan chhut ang chiah a ni thei lo a. Cheng vbc 8,580.19 hmuin beisei aia tam daih hmuh a ni a. Cheng vbc 6,880.76 hmangralin ruahman aia tam sum hman a ni bawk a. Hnathawhna tur sum awm ta chu cheng vbc 1,699.43 niin ruahman aiin a tlem ta duai a. Ruahman aia tam puk a ngaih phah a ni.
Hemi ang zulzui hian kum dang pawh hi awlsam taka hriatthiam theih a nih ka ring a. Inrelbawlna senso pun chhoh chakzia hi hmuh hmaih rual a ni bawk lo a ni. Table en chung hian han chhutin han zirchiang ve teh u le.
Mipui hian thil hria i la, kan hriatna hmangin sorkar hi i khalh ngil ang u.
Sum hmuh leh hman tum dan
2017-18 2018-19 2019-20 2020-21 2021-22
Estimated revenue receipt 8,173.30 8,909.42 9,846.99 9,784.95 9,795.80
Proposed revenue expenses 6,386.21 7,179.61 8,403.51 9,021.84 9,216.38
Estimated revenue surplus 1,787.09 1,729.80 1,443.47 763.11 579.42
A taka sum hmuh leh hman zat
Actual revenue receipt 8,580.19 9,039.49 9,658.25 7,740.66 10,298.73
Actual revenue expenses 6,880.76 7,505.59 9,453.95 8,514.79 10,487.15
Actual revenue surplus / deficit 1,699.43 1,533.90 204.30 -774.12 -188.41
* Kum 2021-22 hi actual ni lovin revised a ni thung.
- Vanlalruata