Rilremtu Rimawi
Lunglen khawhar, khawhar leh lunglen vawng vawng chang i nei ngai em? Hnemtu nei lo, hnartu tawk rengin hringnun i chhiar ṭhin em? A ni zolanu-te chuan maw chutiang laka tap ṭhin leh tap kher lo tan pawh;
Zawhna i nih chuan kei chu chhanna ka ni,
Zaimi inih chuan kei chu rimawi…
tiin chhanna nunnem, hahdam leh hawihhawm tak, thu pai nuam tak mai a rawn phuh chhuak a. A va'n huatthla la lo kher em ti r'u!
PussyCat-i'n aw mawi no sapa “Love in September” hla lungkuai vankaia a sa delh delh ang mai hian tunlai ṭhalai hla “Pangpar” hian ka thinlung a uaithluin a kuaithlu delh delh a nih ber hi.
Hmangaih hmasa, hriatrengna hlu hi nghilhhar mah se tawp chin nei a ni chawk a. A chhan leh vang ther fur mah se ngai lotu ngaia kaih kun reng hi tu fa leh tu pa mah hian an tlin rei tak tak lo. Ngaitu leh ngainatu, hnemtu leh hrethiamtu, inphenna lungpui mamawha phe kual leh thle kual vel mai mai kan nih hlawm vang a ni thei ang.
Nihna ang anga inpawm mai chu a theih e. Nih lohna ang anga inpawm thu awm hek si lo – chutiang rilru pu chuan;
I tan ka awm tih hi hria la ka duh,
Eng hian nge maw i suihlung tihnur,
tia a han sa chhuak maite hi, ho lam leh thu tluang mah ni se lunglai a khik pha ve tlat a. Suangtuahna laili a hawlh phak ve nia maw le.
He ta “I tan ka awm reng” a tih hi eng ang harsatna pawh tawkin tawng la, harsatna hmet dai turte, i lunglai hnemturtein ka awm reng a nia aw, a tihna tlukah ka ngai ve chawt mai. A lo ni lo a nih chuan he hla hian thusawi a nei thuk a, mi rilrua a thawhdan a thuhmun lo tihna a ni mai.
Hmangaihtu chuan a hmangaih chak lohna te, chawi kan an ngaihnate, an derdepna leh dawrawmna, dawi ang dawm an ngaihna zawng zawng a hmu fiah thiam bik a. Hnartu tawk mah se hnemtu nih a peih reng a. Hawtu tawk mah se chhantu nih a ṭhulh ngaiin ka ring lo.
Famkim lohnate, fiam dawl lohnate, fur ruahtui tla ang maia hringnun mittuiin lei tisa a chiah zawp a nih pawn hrukhulsaktu leh hruk faisaktu nih a ṭhulh lo va. Chak lohna ata chak tak leh huai taka ding tura turtu a ni fan a. Famkim lo ringtu kan nih hriain an famkimna lai a thur chhuak thiam a. Hmangaih mai loh chu tih theih a nei lo tih hriain a hmangaih chu a nihna ang angin a hmangaih mai ṭhin a ni.
A ni, he “Pangpar” hla chang lo pawh hmangaihna thuah chuan ṭhalaite hmangaihna thlan tui far chhuak hi a nep lo reng a sin. Awlsam leh awl-ai, zawmnuam, holam anga ngaih theih hahdam leh hahchhawk bawk si, a hlutna hloh chuang si lo hian hla thu chher lamah theihna nei sang tak tak an kat ve nuk a nia.
Chutiang hla zinga pakhat, mi nawlpuiin hla thupuia hman tura anngaih loh “Pangpar” hmanga hla thupui chhep a, a thu leh a thluk te, a ki leh a kaihte phuah chhuaktu SaiWanah hi tu nge a nih ka bel lo. A hmel ang maia fiah no felfai taka satu Omomi Khiangte pawh tu nge a nih ka hre hek lo. Mahse, chu chu ka thinlungah a pawimawh ber lo.
Ka thinlunga pawimawh ber chu – D 'Engtik lai paw'n i tan ka awm reng tih hi hria la' ka duh a. Chutiang a nih chuan ka lawmna Pangpar i ni kumkhua dawn a. Eng dinhmunah pawh dingin, eng thil pawh lo thleng mah se;
I chak lohnaah hian
Chakna ka hmu a,
I famkim lohna hian,
A ti famkim che,
Ka ṭawngkam thiamna pawn, A sawifiah zo lo,
Engti kawngzawn pawn,
Ka hmangaih lo thei lo che…
tih ve mai pawh ka hnial fi-thla zoin ka ring lo ve. A chhan chu maw, rilremtu rimawi hian ril a rem em a ni.
- Lalsiamkima Samte