MSSSB ka fak

Kum 2018 kum tawp lamah Mizo­ramah sorkar a inthlak a, sorkar thar chuan Mizoram Public Service Commi­­ssion (MPSC) hnalak chungchang chhâwk zangkhai nan tiin Mizoram Subordinate Services Selection Board (MSSSB) a din a, chu chuan sorkar hna Group B non gazetted chin leh a hnuai lam zawng a la chho ta a ni.

A tirah chuan MSSSB hian sawisel a kai viau a, MPSC anga hnalatu tur an nih avangin sum leh pai lamah pawh sorkar chuan pawisa a sen belh dawn nia ngaih a ni. Hei bakah hian sorkar tharin ami duhsak zawngte sorkara a thun nan a hmang ang tih hlauin mi tam tak chuan an sawisel phah hial a nih kha!

Chûng selna karah chuan MSSSB chu kal zelin, vawiin thlengin an hna lakah dik lo leh felhlel a awm thawm hriat tur a vang hle, tiin sawi ila kan sawi sual tam awm lo e. MSSSB hnuaia sorkar hna lak reng reng hi notification an chhuah aṭangin kum khat hmain exam an conduct hman deuh vek zel a, hei vang hian hna an lakah an chak hle tiin sawi bawk ila, kan sawi uar lutukin ka ring lo.

MSSSB-in hna a laka lo tling tawh Mizote chu mite'n ani tlin dan kha a fair lo, a luh dan kha a dik lo, tihpuitu ṭha a nei a ni ang. Ani kha sorkar lai an nia puitu a nei ṭha a, a tling a nih kha emaw etc, tia sawi thawm hriat tur a vang hle a ni.

Kumin kumtir lam khan MSSSB-in an hna lakah hnam dang (general category) mi an la tel a, a hunlaia sawisel an hlawhna ber nia ngaih theih a ni bawk. Hemi chung changah hian MSSSB lam hian tihdik loh an nei lo niin a ngaih theih a, an hna lak dan chungchanga dan an siamte an hre chiang hle zawk niin a lang.

Mizo ṭhalai lehkha thiam tam tak sorkar hnaa lut duh leh luh tumte tana pawimawh em em zinga mi chu, hnalatuten fair taka hna an lak leh chak zawka hna lak hi a ni awm e. Covid-19 hri len hnu phei chuan sorkar hna exam reng rengah exam tum an tam ṭhin hle a, hei hi hri len hma paw'n lo tam tawh mahse, hri len hnu hian an tam zual emaw tih mai tur a ni.

Ṭhalaiten sorkar hna an zawn chhan ber nia lang chu security a ni. Covid-19 vang khan sorkar hnathawkte vanneih­zia kan hmuh thiam phah niin a lang bawk. Hei lo pawh Covid-in a nghawng tam tak a awm thei ang.

- Mapuia