THI MAI TUR I NIH TÂKIN...!

Thih hi thil har lo tak mai a ni a, thi hnu tihnun leh erawh mihring thuneihna a ni ve tawh si lo va, an liam ta vang vang zel mai chu a nih hi!

"Vanram te hi an sawi fo a, tumahin kal hmasak an châk si lo!" tiin tihelna in dawng tawh ṭhin ang. Thih in hreh avangin indem suh u, Pathian aṭanga hmangaihna kan chhawm avangin inkalsan boruak hi kan pal châk lo mai zawk a ni. 

Nikum (2019) khan cancer natna ka'n kawl ve hlauh mai a, ṭum khat chu heti hian ka inngaihtuah ve a: "Cancer natna thihpui an tam si a, kei hi lo thi ve dawn ta ila..." tiin thihna chu ka thinlungin ka'n dai chhin vel a. Ka hmangaih, ka chhungte ka ngaihtuah chuan ka zuam mawlh lo. 

Mahse, Krista tlanna hnathawh lam chauh ka'n thlir ve leh a, chu chuan ka dinhmun tur chiang takin min hriattir a; Pathian thlamuanna, rilru reng renga hriat sên ngai loh khan min rawn tuam ta! 

Khatih lai tak khan thi dawn ta ila, zin khawthawng lawk turin hlim taka a chhungte a 'bye bye' ang hian hlim taka nui chungin ka chhungte ka kalsan ve thei ngei ang. Thih thlamuanna hi thih dawnah chauh lo pawh hian a lo chan theih tih ka tem chiang ngei mai. 

Kan hun tawn hi en teh ang le: Pathian rorelna ṭhut phah hmaa inlan hlawl mai a va awl dawn êm! I tana Pathianin a ruat zingah hian thihna a tel ngei mai si a (Heb.9:27), chu chu i tawn mai tur a nih tâkin hei hi 

ṭhahnemngai takin ka hriattir a che :

Isua ring rawh

I sualna a phurhsak tawh che a, Diabola kut ata a tlan chhuak tawh che a, Pathianin a faah a vuah tawh bawk che (I Jh.3:1) a, ngaihdam leh tihthianghlim i ni tawh e (Kol.1:14; I Kor.6:11; Heb.10:10). Boralna lak ata chhandam tur chea Isua rawn kal kha hlawhchhamin vanah a kir lo tih hi hria la, ringhlel suh. Chu chhandamna chu i lêi ni lo, a thlâwna an pêk che a ni (Eph.2:8). 

Tunlai chhuante hian rinna kan tlachham sâwt tlat (Lk.18:8), kan pipute dampui - "Isua hi lo ring ve tawh rawh u" tih kha kan mamawh leh ta! Isua hnathawh kan muanpui zo lo va, keinin kan thawh ṭhat erawh chuan kan thlamuang leh lawi si! 

Mahni felnaa chhandam kan ni lo, ni ila Isuan ropuina leh chawimawina a hlawh thei lo vang! Krista Isua inthawina thisen avang chauha faa vuah, thiam chantir leh van khua leh tuia siam kan ni; chu Isua kan rinna chu kan vanram ticket chu a ni e. Thi mai tur i nih tâkin chu rinna chu lo hloh ngai suh ang che. 

Ticket neite tana thlen loh theihna la awm chu - tawhsual tawh (accident) a ni. I accident loh hlauin Setana chuan phi ruai khawpin a chhaih ngar ngar che a (I Pet.5:8). Chhandam hlimna i chan ṭhin rûksak chea, i rinna tihhlum leh i Kristian nun tihchhiat vek kha a tum a ni (Jh.10:10). Chutiang accident tâwk mêk i nih chuan harh la, i Pathian lam en la,  hma lam pan turin tho nghal rawh le (Mik.7:7,8), i inpui i thleng zo lo palh ang e! 

Unau duh tak, lirnghing, hri leng, indona leh chhan dang engemaw vanga thi mai tur i nih tâkin i Pathian hmaa inlanpui atan i thil neih dang reng rengte kha rintlak a awm si lo va, Isua i rinna kha vawng tlat la, i rinna chu a thih lohna turin thiltih ṭhain umzui zel teh le (Eph.2:10; Jak.2:17).