Mimawl Zawhna panga

Tunlai boruak thlir vel hian mipui nawlpui aiawh hian zawhna zawt ta ila. Chu chu keini ang bawka thil hre lo te aiawh angrengin 'Mamawl Zawhna' tiin dah ta ila, hei hi mahni irawm chhuak zawhna bakah social media hrang hrang 

aṭanga lak khawm hmanga zawh chhuah a ni tih chhiartuten min lo hriatpui turin ka chah duh nghal bawk a ni:-

1. Zu khap bur duhna state a kan awm leh tak hnu hian zu hi a tlem sawt nge a to viau ringawt? Zu in duh ni ta la, pawisa nei bawk la zu hi chu in tur i nei reng tho dawn nge pawisa nei tan pawh zu lei tur a awm tawh miah lo zawk? Azawl khawpui daiah hian zu zawrhna kumhlun ve tak tak (veng hming ziak lo mai ila) a awm ṭhin a, henga mite hian eng hmangin nge ei an zawn chhunzawm tak zel, zu hmang bawkin ei an la zawng em ni?

2. Aizawla motor parking kal puina tur PAHOSS hi hri lenlai hian an la kalpui zel em? A thlangtu tur Committee a awm nge nia UD&PA aṭang hian an thlang tawp nge party lam aṭangin an thlang nge, Engineer-ten kalin an finfiah hnuah an thlang zawk? UD&PA hian Engineer an nei tlem si a, mithiam enfiah lovin an thlang pawp pawp zel mai em ni?

3. Bawngkawna leiminna kha AMC khan an phalna la lova laih a nih thu an sawi a, khatiang thilah khan FIR lut a awm em? Hman deuha Dinthar Task Force tihsuala FIR a hranpaa thehluh ngai lova dan hre mi lamin an tih angte khan a tih ve theih em, kawngpui pawimawh kha rei tak a dang si a? Tin, leivung kha paih a nih khan mimal senso nge sorkar sensoin an paih zawh tak le? Mimal sensoa paih a nih loh chuan kawngpui kama lei lai tan chim thei tur anga hnutchhiah zelin furah a chim hun nghak ila sorkarin min paih sak chuan vanduai vannei a nih mai theih lo maw? Rangvamuala leimin kumhlun ṭhin pawh kha sorkarin a siam ta em ni kha?

4. Durtlang kawng chho hi in sak phal lohna hmun tiin sawi ṭhin a ni a, tunah hi chuan Bawngkawn Brigade peng aṭang hian in hi a insi chho ta khup si a, kha thupek kha a reh hlen ta em ni?

5. Hman nia lei chim awm leh kha a va reh ta ve? Congress hunlaiin a chim hnem sia Congress an au ngam lova. MNF lah hi Congress sorkar laia lei chim avanga PWD Minister bang tura phutu kha an ni sia an au ngam bik lo em ni? ZPM hi an va nêp ve, an au ngam lo em ni?