Chakma aia hlauhawm Vai hminga sumdawnna

Chakma zirlaite’n kan Mizo zirlaite thiamna lama khumin an quota ngei (dan angin) an chang ve dawn a, kan phal lova, ram pumin kan au a, kan chiai a, Chakma-in min chimral tur thu kan sawi a. A dik pawh a dik ang. Vai leh an thurualpuite chuan sumdawnna hmangin min chimral mek tawh zawk asin.

Vishal an hawn dawn khan, MIMA khan an dodal nasa a, mipuiin MIMA kan dem. Kan dem chhan chu Vishal lamah khan thawmhnaw man ‘a tlawm’ tlat a ni. Vishal neitu kha Vai a ni a, Mizo hming hawhin Mizo nen an inrem siam a, kan Mizo sumdawngte an rêp a, an tibuai dawn tih an sawi chung pawhin ‘a tlawm’ tiin Vai sumdawnna Vishal kan chhan tlat a, an dawr hi fakna tih pawh ngai loin mipuiin kan bawh a ni.

Hnam tan a pawizia MZP-in an au chhuahpui a, hetianga thi leh thau pawlah Mizo hnam tana beitute hi “MZP ve si” tih bak kan hlawhtlir lova, kan rama Vai dan ang thlapa an sumdawn chu a dikah kan pawm ta a ni awm e. Vai sumdawnna lian tham lo lut hi ‘a hlauhawm loh’ kan ti a, nakin lawkah midang an lo lut ve leh ang a, hetiang sumdawnna lian hi Mizoramah 100 awm se, Mizote hi Mizo dawrah kan bazar tawh dawn lova, Vai dawrah vek kan bazar dawn tih hi ka thlir ve dan mawl tak, dik sia ka ngaih chu a ni.

Tun hnaiah hian Vai sumdawnna lian tham bawk an din leh dawn an ni a, hei hi ‘hmasawnna’ anga kan ngai zel dawn a nih chuan kei chuan Chakma aia hlauhawm, sumdawnna hmanga Mizote min ei raltu tur Vai dawr lian hi kan hlau lo luiah ka ngai ve thung dawn a ni. Mizoram kil khata awm Chakma-te hian min chimral hi ka ring kumkhua lova, Tlabunga Mizo tlem te pawh ngam lo an ni tih an kawngzawh an tihtawp sak video en khan a chiang a ni lom ni?

Vai sumdawng hi chuan min hneh zel a, min la hneh belh zel ang a, sum lama an zawmpui kan Mizo puite ngei hian an chhan tlat thung ang a, nakinah chuan Mizoram sumdawnna lian hi Vai control vek a la ni ang. Chakma aiin Vai sumdawn pui hi a hlauhawm zawk.

Chakma MBBS zir tur hi a zir chhuah hunah Mizo doctor awm peih lohna Tlabung area lamah awm mai se, ram leh hnam tan hlauhawm vakah ka ngai ve lo, Vai dawr lian Mizo ta anga kal, a taka Vai ta ni si hmanga min chim ral mek hi a hlauhawm zawk a ni.

- Lalrammawia