ENG NGE LO THLENG THEI NGAIHTUAH A HUN...

Hri leng vangin khawvel a buai mup mup a. Chutih laiin lirnghing a lo awm ve reng bawk a. Ram leh ram a inep ṭan ta reng bawk nen, kan khawvel hun a hmawr tawh tia au an awm mek bawk a. Ni ngeiin a lang ta - ṭam hi kan hmabak a ni mai ang em? 

Mizoram pawh he hrileng hian a hmaih lo. Mizote kan ṭangrual ṭha hle mai a, a lawmawm tak zet. Chutihruala kan sawi ve chak chu hei hi a ni. He hri lengin min tibuai chung chung hian kan eizawnna kan thlah a thiang chuang lo tih lai hi a ni. Tunah hian kan sorkarin ṭha nia a hriat dana ro a rel hian mipui a nghawng na chho mek zel a. Mi tam tak eizawnna a tawp mek bawk. Ṭhenkhatin an ṭhatpui em em laiin 

ṭhenkhat tan erawh rilṭama awm mai hmabak kan ni taa hriatna ka nei tlat mai pek a. Ṭhenkhatin dawr an hawng thei a, ṭhenkhatin an hawng thei lo; a inhawng chhun an lun em em a. A tam zawk hawn phal sak an ni lo bawk si. A inhawngte hmun lun em emnaah hian hri an kai tih lah a awm chuang si lo. 

Dawr khar kalpui zel hi a ṭha ber loin a hriat ta. 

Nitin eichawp dap lainat­na tel lova ro rel a ang ta riau mai lehnghal. Taxi/ two wheeler taxi a eizawng tan tlan phal a nih loh vangin an eizawnna a tawp rih a. Kawtthlera eizawngte leh hawkers-te tan inzawrh khap a nih vangin an eizawnna a tawp bawk. Nitina inhlawh phal sak chin a awm. Mahse chung thawk duh tan chuan engkim mai a harsa lawi si. Chak lak a harsa a, a harsat vangin thil a to bawk. 

Mi venga inhlawha kal a rem tlat lo bawk, veng ṭhenkhatah. Mahni venga inhlawhna hmu thei mi tlem tlem chu an awm. Mahse hei hian kan harsatna a phuhruk zo meuh lo. Mi harsa tak takte au thawmin kan roreltute beng a thleng zo lo nge? Kan roreltute hian hlawh an lak reng theih tho vang hian mi retheite an lainat ve lem lo zawk aw! 

Hetiang renga kan rama inkharkhipna kalpui a nih chuan, mi rethei kan pung tual tual ang a. Pawisak neih lohnate pawh a hrin thuai a hlauhawm hle mai. Kan roreltute hian hna thawk theiin mipui min dah se. Kan ram leh hnam chhan nana fimkhur tak chunga hna thawh a ngai ta a ni. 

Thingtlang lamin thlai nasa takin an thar a, a hralhna tur a awm reng chungin hralh thei dinhmunah an ding lawi si lo. A chhan chu motor servise a awm tlat lo, chutihlaiin essential commodities phurte chu tlan phal a ni a. Mahse hetiang tur hian mirethei, thlai tam tak thar si lo tan a ngaihtuah a harsa tlat. Sumo servise a awm chuan an thlai thar tlem tlem thawn dan a awm tal a. Chuti chunga thlai thar Aizawl thleng chhunte chu to tak taka hralh a ni bawk a. Aizawla miten loh theih loha kan lei a ngai lawi si. A va manganthlak tak em. 

Nitinin kan dawr lun lem lo tak tak hi hawng thei ila chuan tlem tlem inhralhna khan kan eichawp a tum pha mahna ti a, Tlumtea thlira a lo thlir chu a thleng mai tura beisei a nih laiin kharkhipna kalpui a la ni ta zel bawk si nen. Tuna dawr khar mekte hi a lun lo zual zawk an ni leh nghal! 

Kan ram dinhmun kal zel tur thlir hian kan ram leh mipuite tana roreltute ro rel dan hi tlem chuan a felhlel deuhin a lang. Hri hi kai belh zelin, thi hi awm ta zel se he thu hi kan ziakin hetiang zawng hian kan thai ngam kher lovang. Mahse he hri kaite dinhmun a ṭha tawh a, 

ṭhat lam an pan zel chung leh, lo haw tharte leh hri veite dah hran an ni vek bawk a. Mipuia in kai darhna a awm lo chunga mipui min khar khip rei lutuk a nih chuan, he kharkhipna roreltute hi mipuite dem rawn nih a va hlauhawm ta em.