Vai puithiam vengtu rinawmte

United States-a Al Qaeda mi firfiakten 9/11 an tiha pawi rapthlak tak an khawih dawn zana an awm dan, a tûka thi mai tur ni si, an hlauhthawn lohzia, an inpêkna thûkzia, an huaisenzia leh, an sakhaw thila martar tur nia inngai thlapa, nghakhlel zawk ang maia an awm dante kha mak tak a ni.

Khatiang deuh kha tun hnaia Dera Sacha Sauda hotupa, Gurmeet Ram Rahim Singh-a chungchangah pawh hian a awm a, a zuitute zingah hian an hotupa tana thih huam an tam avangin, a tànna lung in pawh an bei duh mai ang tih Police-te pawhin an ring a, an engto viau mai. Tunah pawh hian, he pawla mi engemawzat chuan an pawl leh an hotupa tana thih an inpeih reng thu, stamp paper-a ziaka Affidavit siamin an dah thlap tawh a, an thi a nih pawhin, mi dang mawh a nih loh tur thu, hming ziah hnanin an nemnghet sa thlap a ni.

Amah zuitute zinga hmeichhe pahnih pawngsuala puh a nihna thubuaia Panchkula-a Special CBI court-in a thuchhuak a puan ni, Aug. ni 25-ah pawh khan amah vengtu, an pawla Commando-ten an hotupa hi tharum thawha tlanbopui an tum a lo ni a, Haryana Police-ten an titlawlh thei hlauh a ni. Khami ni khan, thiam loh chantir a nih thu puan a nih veleh Rahim Singh-a khan Sirsa aṭanga a ken, a thawmhnaw dahna nia a sawi, ip sen chu a mamawh thu a sawi a, ip hmang chuan pawn lama amah zuitute chu a chunga thil thleng hriattir a tum a lo ni a, ip sen chu motor aṭanga lak chhuah a nih veleh, court aṭanga hla fe-ah thawm a awm nghal a, Police-ten an hrethiam ta a ni. Hemi bâkah hian Rahim Singh-a leh a fanu chu Panchkula court complex corridor-ah rei deuh an ding dun a, hei hi hmun dang an pan dawn tih, pawn lama a hoten an lo hriat theih nana hun tihkhawtlaina tur nia hriat a ni bawk.

A chuanna tur motor pawh Police-te chuan an thlak ta thut a, court a panna motor-a chuantir lovin, DCP (Crime) Sumit Kumar-a motor-ah an dah ta a, motor-a a ṭhut veleh a commando-te chuan an pu chu an rawn hual ta nghal reng a ni. Police-te nen chuan an innuai ta deuh a, Police-ten silai hmeh puah loh hram an tum avang leh, silai a puah chuan he puithiam zuitu, a nuai télin an rawn bawh ang tih an hlauhthawn avangin, tharumin an inpawm chilh ta a, hliam pawh an awm ta nual a ni. Khami ni khan Dera hotupa zuitute hian an motor 80 vel chu court aṭanga hla vak lo-ah an dah a, court an chhuahsan pawhin heng motor-te awmna hi pal tlang him dawn lova an hriat avangin Police-te chuan kawng dang an zawhpui ta a, helipad thlenpui tur hian Police motor chu sipai motor an zuitir a, chuti pawhin an him zo ta chuang lo.

Helipad an pan lai chuan Dera hotupa private commando-te chuan Police te chu an zui lui ta tlat a, Police te nen an innuai leh a, a ṭhen chu an man ta nual a ni. Hetih lai vel hian darkar chanve vel chu a zuitute hian an pu awmna an hre thei ta chiah lova, helicopter-in Rohtak-a Sunaria jail an thlen thei ta hram a ni. August ni 27-ah pawh khan Police-ten Ambala-ah mi pahnih, cheng nuai 38 kawl an man a, he pawisa hi Dera hotupa tana engkim huama buaina siam ngamte hnena sem tur niin an sawi.

Court thuchhuak puan ni-ah pawh khan Rs.1,000/- leh petrol litre 30 vel pêka buaina siam inhuam an lo tam mai a, an ukil chuan, 'An retheih êm avangin an tan pawisa tlemte pawh a hlu a, bumin an awm a ni' tiin court-ah ngaihdam a dilsak a nih kha. Sakhaw thilah hian rin aiin a lo kal thui theih viau dawn a lo ni a, miin thih chilh an huam tawh phei chuan buaithlak thei tak a ni.

Hei kum 20 táng tura tih a ni ta a, a rei ve ngar ngar ngawt ang.

- RK Lianzuala