RINNA LEH BEISEINAIN

China thufing chuan, 'Khaw thim ânchhia lawh suh, bati chhi mai zawk rawh' a ti a. Bati hi hma lam huna beiseina nung nei tura infuihna leh entirna atan an hmang ṭhin a ni awm e. 

Nurse-ho pawh hian an zirna tawp dawnah inthlahna leh dahnghehna hun an hman laiin bati an chhi fo a, chu chu mi dang tâna nunna êng leh beiseina petu an ni tih entirna a ni ber awm e. Beiseina chuan nun a tinuam a, ipikna ata thawvenna min thlen thei ṭhin. Beiseina nei lo mihring tluka khawngaihthlak an awm lo. Retheihna leh manganna-in kan nun a tih buaia a delh beh tlat lai pawhin beiseina chuan chakna min pe thar leh ṭhin. 

Gerard Berghoef leh Lester DeKoster te ṭhian dun chuan an lehkhabu inziah ṭawm pakhatah chuan, 'Beiseina tel lova dam hi hringnun ânchhia a ni.' an ti tawl mai! 

Tirhkoh Petera chuan, Isua Krista thawhlehna avanga Pathianin beiseina nung nei tura min hrin leh thu a sawi (1 Pet. 1.3). Pathian meuh pawhin beiseina nei turin a hrinin min hring a nih chuan, beidawnga indawm kun tur kan ni lo ang. 

Mihring thinlungah hian beidawnna leh beiseina chu a awm reng a. Kan dah sân leh kan hman duh zawk zawk chu hmang mai tur kan ni. Mi beidawngte’n hma lam hun hlimawm thleng zo loin an nunna hlu tak an chân fo a, beiseina nung neitute erawh chuan beiseina meisi chu meipuiah chantirin thimna an hneh leh ṭhin. 

Kan tunlai boruak­ah hian thawpik leh beidawngin i awm ṭhin em? Hma lam hun hlimawm leh nuam aiin hma lam huna thim thuah hnih lo thleng tura an sawi fote hian i nun a tizîng chûk ṭhin em le? Rinna pa ti hiala koh hlawh Abrahama kha thlir la, ani chuan beisei awm a awm loh hnuah pawh a beisei tlat a. Chhiatna kârah hian buaina chhum kâra ni êng mawi tak lo chhuak tur chu rinna nen beisei ve tlat ang che. 

Chu i beiseina tihlawhtling tur chuan rinna nei la, beiseina i neih nasatzia ang zela i beiseina a taka chantir tura i tâna awm reng hi theihnghilh suh - Pathian ngei chu.