Mizo ṭawng thiam CS dil fo hi Dan bawhchhiatna a ni
Kum 2019 khan Mizoramin Governor nghet kan nei thei lo a, kan Governor te thlak fo a. Khatiang vela Central lamin min tih kual hnu khan khatih laia Mizoram Assembly speaker Lalrinliana Sailo chuan Mizorama Governor nghet dah turin President Ram Nath Kovind hnenah ngenna a thawn a. President khan a rawn chhan mai loh avangin Speaker chuan prime minister Narendra Modi hnenah ngenna a thawn leh tih te kha kan lo buai tawhna a ni.
Governor an thlak chhen kha chu Mizo hnam zahlohna rawng a kai deuh.
Buaina chi hrang hrang a awm thei ang a, thil tih awm deuh leh tih awm ni lem lo te pawh a awm ve ṭhin. Tunah Mizo ṭawng thiam ngei CS neih duhin kan Chief Minister meuh pawh a buai ta fo mai.
CM hian Prime Minister Narendra Modi hnenah Mizo ṭawng thiam CS pe turin a zu ngen hial a ni. Mizoram sokar hian hun rei tak chhung chu Chief Secretary atan Mizo ṭawng thiam neih tumin a buai ta.
NGO Coordination Committee pawh an lo phusa ve a, tuna kan CS hi a pisa kai tur dan an lo tum hial tawh a, nimahsela an ṭhulh leh ta hlauh a, kawng lehlah takah chuan a mualpho thlak ta lo hlauh e, ka lo ti a ni.
Chief Secretary atan hian Mizo ṭawng thiam ngei nei ta ila, tuna kan hmasawnna emaw kan thlen chin aia sang min thlen pui theih dan tur hi ka hre miah lo. Hei hi kan sorkar chak tak leh kan chhuan tawlawl, NGO Coordination Committee pawh hian an ngaihtuah thleng phak em?
Hnamdang CS kan nei a, ani hi kan Chief Secretary ni tawhte aia a ṭhat loh zawkna emaw, a thawh chak loh lam sawi tur kan hria pawh a ni si lo a, Mizo CS neih duh vang ringawta Chief Secretary thar ngen hi thil hriatthiam har tak a ni phawt mai.
State dang pawhin an state mi leh sa, anmahni hnam pui ngei Chief Secretary neih tumin an phe sek tih kan hre lo. Pu Lalthara te ngei pawh kha chen kha state dangah CS hna thawkin a awm a, Mizo a nih avanga an hnual pui thu kan hre miah lo.
An hna a ṭha lo a nih erawh chuan Mizo an ni emaw hnam dang pawh ni se kan duh loin kan hnuaisuat ngam tur a ni. A ṭul chuan Mizo mipui pawhin kawng te kan zawh mai tur a ni, chutiang ni loa chhan mumal awm loa hnam leh hnam inkara inthliar hranna awm thei ang zawnga kan sorkar hotu ber a che fo mai hi India dan pui palzutna a ni pha hialin ka hria a, sim vat tur a ni.
Mizo CS neih tuma an buai fo hi tih tur dang an hre thlawt lo nge, hma kan sawn phah sawtna tur thil ṭha deuh an lo hre ru reng zawk tih hi Mizo mipuite hriatah han puang chiang law law teh se.
- Vohbika Pu