EI LEH BAR INTODELH

All India Radio-in 'Intodelhna' rawn sawi ve teh min ti a, ka va lawm ve le. Zanlaiah pawh min kai tho ula Zoram intodelhna tur sawi rawh min tih chuan tawngvai miah lovin ka sawi thei ang ka ti a. Kan ram hruaitute leh mipuiin an pawm leh pawm loh chu thu dang ni se la. 

Kum 1982 ah khan North East tlang mite intodelhlohna (Tribal Economic Dependency) hi ka vei ve ṭan a. Tichuan, Tea Garden Labourere harsatna leh Tribal harsatna te kan zir a. Thiam ang tawkin ka ziak ve ṭan a. Kum 1986 khan Harare University-ah International Program-ah “North East India Tribal Problems and Struggle” paper ka present a. 9the Five Year Plan tih dawn khan Calcutta University-ah hetiang paper bawk hi ka present leh a. Tribal theology te developed in, tribal harsatna, a bik takin intodelh lohna (Economic Dependency) hi vawiin thlengin ka buaipui ta a ni. Chuvangin, thil ṭhenkhat rilrua chiang em em hi a awm a ni. 

Lockdown-in a ṭha zawnga thil a hrin chhuah chu “Ei leh bara intodelh ngaihpawimawhna” leh “buh ni lo, thlaiah lamah chuan kan intodelh thei a ni tih hriat chhuahna” a ni. Kan ṭam dawn si a tia pangbal lo ching ta chiam te, leipui leh chuktuah huana thlai chi hrang hrang ching ta chiam chiam te an awm a, hei hi thil ṭha tak a ni. He mi piah lam kan thlira, ruahmanna ṭha tak kan siam erawh chu a ngai a ni. 

“Khawvel huapin ngaihtuah la, i awm hmunah thawk rawh” (Think globally, act locally) kan ti ṭhin a. Khawvel hmasawn dan thlir phawt ila, kan rama kan tih dan kan ngaihtuah dawn a ni. 

1. Development inṭanna chu luipui kam development, (river based development) a ni a, hei hi Agriculture development a ni. Entirnan Indus Valley, Nile Valley, Tigris Valley, Chindwin Valley, Amazon Valley, Yungtes Valley etc hi khawvel hmasawnna inṭanna a ni, etc. He mi hnu hian Indus­trial Revolution a lo thleng a. 

2. Industrial Revolution chuan ei sen loh, hman sen loh, hralh chhuah tur tam tak a hring chuak a, tichuan tuifinriat behchhanin lawngin thil tam tak an thawn chhuak a. Hei hi Ocean based Industrial development a ni. He mi hnu hian technological revolution a lo thleng leh a. 

3. Technological Revolution hian tihdan awlsam zawk, chak zawk, ṭha zawk a rawn hring chhuak ta a ni. Hei hi Industrial revolution-in a hrin chhuah a ni. 

Industrial revolution leh Technological revolution hian khawvel hmasawnna ropui tak thlen mahse mihring hmasawna khalh kaltu (economic driver) pawimawh tak chu Agriculture Development a ni tho mai. Coal leh Oil-te hi power atan pawimawh hle mahse, ei tur a awm a ṭul a, chuvangin ei leh bara intodelh a la pawimawh reng a ni. 

Mizoram

Mizoram Net State Domestic Product (NSDP) per capita chu kum 2018-19 khan Rs 1,68,188 per annum a ni a, North East India-ah Sikkim tih lovah chuan a sang ber a, All India state zingah 16th a ni. Mahse kan source of income kan hria a, kan thla a muang lo a ni. Ei leh bara kan intodelh loh chuan kan thla a muang lovang. 

1. Farmer/ Agriculture Subsidy: Ei leh bar thawk chhuak tur chuan lo neitute chhawmdawl dan tur leh tihchak dan tur policy ṭha tak kan neih a ṭul. Industry-ah ropui hle mahse USA meuh pawhin an economic stability atan Farmer Subsidy/ Agriculture Subsidy vawiiin thlengin a la pe reng a ni. 

2. Minimum Support Price: Buh/thlai thar leisak nan (Minimum Support Price) sawrkarin rate siamin mamawh zat tur chu budget-a dahin hma lak tur a ni. 

Hei hi India ramah kum 1965 aṭang khan tih ṭan tawh a ni a, kan ramah kan la ti mumal tlat lo a ni. Hetiang system hi awm sela, a rate pawh ṭha thawkhat se la chuan buh leh thlai chu ei sen loh kan thar mai ang. Agriculture Department lian tak siam a, engkim mai sawrkar hmalakna kalpui tum ai chuan, loneitute thawh chhuah lei sak tur zawngin kan rilru seng ila. Buhfai Mizoram a lo thlenna rate hi Kg-ah Rs 35 a nih chuan Rs 40 in lei ngam ta ila, Rs 30 pawhin hralh chhuak leh ta ila kan ram tan a ṭha zawk ang. 

3. Agriculture Highway sia: Agriculture link road kan siam kha a theuneu lutuk, kum khat daih tawk lek a ni. Kan maintain zui bawk si lova, chuvangin Agriculture High Way siam zawk tur a ni. 

Khawtlang lam hi Mizorama ei leh bar awmna hmun a ni a, chuvangin 'Mizoram Agriculture Highway' siam ila, Sairang rail station nena thlun zawm tur a ni. Paletoa- Rala phai, Chamdurphai, Chawntelui hruatin, Kauphai- Sairang rail head nena thlunzawm tur kawngpui siam tur a ni. Hei hian kan rama buhbal thar theihna ram ṭha zawng zawng chu a hruat chhuak vek ang. 

4. Mizoram Agriculture Bank leh Agriculture Marketing Corporation rin tlak neih ve a ṭul khawp mai. Tun aia ṭha zawk leh sawt zawkin NABARD nen pawh kan thawk thei ang. 

5. Hnathawk thiam leh taima (skilled labour and hard­working): Sumdawnna (entre­preneur) a ni emaw, agriculture farming a ni emaw, eng pawh ti dawn ila, thawk thiam leh thawk peih kan mamawh. Nelson Mandela chuan South Africa-ah ni ngo rorelna (Apartheid system) an paih khan, hetiang hi a sawi, “Nationalism kan ei thei lova, mi thiam leh hnathawk thei kan mamawh a, chuvangin mi ngo ho hi thlamuang tak leh him takin an awm tur a ni, kan ramin a mamawh,” a ti a. Hetiang deuh, kan ram pawhin political slogan ni lovin, a taka ti peih leh ti thiam a mamawh a ni. 

Zoram, lo ding chhuak rawh.