Kawngpui chhia hi inthlahdah vang

Tunlaiin Mizoramah kawngpui a chhiat thu kan ngaithla nasa a, thlalak hrang hrangah nen kan hmu bawk a, a takin kan zawh bawk a, hei hi a chhan bulpui ber kan zawn chhuah duh chuan sorkar inthlahdah vang a ni mai.

Fur a rei thu leh kuminah kan inrin hmain fur a lo thleng thut a, a sur mai mai dawn emaw kan tih kha August thla tawp thlengin a chhunzawm ta chur chur a, hnathawh theih a ni tawh lo. Hnathawh theih hun chhunga thawk mang si lo kha, furah kawngpui a min a, an buai a, a tawpah PWD lam rang tak takin leimin thianin an kal thei tho si a, kan kawngpuite kha rang tak takin lo siam ta zawk se ṭha tur a nia.

Sorkarin sum awm loh chhuanlamah a hmang lova, pawisa a awm thu pawh an sawi a, tunah hian sum chu a awm a, siamna hun a awm lo an ti a ni awm a, siamna hun ṭha bawlh pelhin kum 2018 hi kan sorkar hian a nghak niin ka hria a, mahse kum 2018 ah hian thlem lungawi theih kan ni dawn em ni le?

Tun hma khan an duh duh an sawi a, an chan ṭhat theihna tur a nih chuan an duh duh an tiamin an sawi a. An han sorkar ta cheng a, an thutiam an hre chang tawh lo a, an duh dan dan chauhin min hruai a. An thu sawi han chhuahchhal ila, “Chutiangin ka sawi lo” an ti a, dawt sawiah min puh let hial ṭhin. Mahse khatiang hun kha a liam a, media a ṭha tawh a, thil kan chik tawh bawk; ṭhalaite hi bum mai mai theih kan ni tawh lo a, inthlan hma zawnga min ngaihthahtute hian inthlan dawn chauhah chauh kawng te siamṭha in min ngaihsak tlai khawhnu a nih ngat chuan min thlem lungawi an tum dan hi a Pharisai lutuk tawh ang a. Mipuite pawh hian tih theih kan nei ve a ni tih hi kan hmuh tir a hun e.

Kawngpui ṭha hi chu kan la nei ngei dawn a, tun aṭanga thla tam a ni tawh lo vang, tunah hian kawngpui siamna sum hi a awm tawh an ti. Hetia kawng chhe takah mangang taka mipui kan awm chhan hi sorkar a mutthluk rei vang a ni e.

- Lalthansanga