Hmeichhe phone hmang nasa hi

India ramah hmeichhe dinhmun chawisan nan nasa takin sorkar angin hma lak a ni a, hemi atan hian Mizoramah pawh theihtawp chhuak zel a ni. Mizo zingah pawh pi leh pu hunlai kha chuan hmeichhe dinhmun kha a hniam hle a, tunah chuan kan intluk tlang mai a ni tawh lo a, hmeichhe dinhmun a sang tawh zawk emaw tih theih a ni ta hial mai.

Chuvang tak chu a niang chu, kan khawlaiah hian hmeichhia hna­thawka buai nge tih pawh hriat loh an tam em em mai hi an dinhmun san tawh vangah a ngaih theih ang em? Mipa ang bawkin zalenna a nei tih chu thu awmsa a nih laiin an zalen ta mah mah mai.

Khawlaiah phone ṭha tak tak nen an veivak a, ṭul lem lo ni ngei turah pawh an phone an hmet chhen maite hi a zahthlak deuhin ka hria a ni.

Hnamdang a bikin vaiho zingah khawlaia hmeichhe phone hmang a, ring tak taka ṭawng lung lung hmuh tur an vang viau. Kei ni Aizawl khawpui chhungah hian han hawi vel ta la, thui i kal hmain hmeichhe phone be lung lung i hmu ṭeuh ang. Hetiang hi veng hrang hrangah hmuh tur a awm, veng tlaberah leh veng changkangah pawh a ni tho. Kawngsir maiah ni lo, kawng cross lai takte hian zu ṭawng zuah zuah a maw le. Hei hi lirthei laka himna atan a hlauhawm em em a ni tih hriat a ṭha.

Tun hnaiah two wheelers taxi a rawn chhuak thar a, a hmang tam ber chu hmeichhia bawk an ni a, ka hmuh tam zawk chuan a khalhtu hnung aṭangin phone an hmang nasa viau mai. Hei hi chu an laklawh vang pawh a ni thei a, thiam loh em emna tur a awm lem lo. Mahse kawngsir lirthei kalna bula an hmang te, kawng an cross lai tak an han ṭawng lang langte ai chuan a zia viau e.

A thu hrimah kan hmeichhiate khawlaia an tam lutuk hi a ngaihmawhawm ka ti. Chutih laiin dem vek theih emaw, sawisel vek theih erawh an ni lo. Ei an zawng emaw, eizawnna tur ngaihtuaha vak chhuak lo thei lo an ni ve bawkin ka ring. Chu pawh nise India ramah keini Mizote hi a hnam anga hmei­chhe zalenna hi an awm ang emaw?

- Lalkhirhvela