Ka han sawi ve mai mai teh ang
Tunah zet chuan kan ram a changkangin hma kan sawn nasa ta hle mai a, a lawmawm hle a ni. Hetia hma kan sawn leh kan changkan viau chhan hi a chhan sawi tur tam tak a awm ang a, a pawimawh berah chuan hmasawn tur leh changkang tur hian zirna, thiamna hi a pawimawh ber a ni ti ila kan ti sual tam awm lo ve.
Tichuan, zir thiamna kan ngaih pawimawh tak em em avangin kan ramah hian zirna sikul chi hrang hrang a lo tam ta viau mai a, chung zirna sikulte chu English medium an ni deuh vek hlawm bawk. Heng sikulah hian a hla pawh sawi loin, zir man a tam pawh sawi loin kan tu leh fate kan luh tir ta sup sup mai a ni a, kan sorkar sikul te chu an ruak vek lo chauh a ni ta ber mai.
Sorkar sikulah hian zirtirtu lah chu an awm del dul mai bawk sia, sorkar sikula zirtirtua thawkte ngei pawh hian an sikulah an tu an fate an luhtir duh hauh lo lehnghal. English medium-ah vek an luh tir ang lawi a, engati ta nge ni ang? An thawhna sikula luh tir duh lo a, sikul danga an luh tir tak vek mai le? An thawhna sorkar sikul hi luhna tlakah an ngai lo nge, enge a chhan? Heti reng renga kan kal chho zel dawn chuan kan sorkar sikul zawng zawng hi khar vek tawh mai ila a ṭha mai lawm ni? Naupang tlem te zir tirtu tam deuhin an zirtir a, engmah an thiam chuang si lo.
Sorkar sikul hi luhna tlakah kan ngai lo a nih chuan enge kan sorkar sikul te hi an awm ve reng a ṭulna? Kan ti tawp lo a nih pawhin kan zir dan hi kan thlak vat a ngai a ni. Kan sorkar sikul te hi luhna tlak leh lehkha zirna tlakah kan siam leh vat loh chuan heng kan sikulah hian sum kan seng thlawn mai mai tlat a ni.
Heti zawng hian han sawi ila. Tuna kan Primary sikul zawng zawng hi English medium-ah let vek ila a ṭha phianin a rinawm. Chuti a nih loh chuan tun aṭanga kum sawm a lo kal leh ngat chuan sorkar Primary sikul-ah hian lut tur kan in hmu zo tawh lo maithei. Heti tak maia English medium kan bawh a nih si chuan tuna kan kalphung hi tih danglam mai nise a ṭha ang. Tunah phei chuan mithiam pui pui an tam tawh a, a zir dan kalphung kan tidanglam thei a nih chuan kan ram tan hmasawnna ropui tak a ni ngei ang.
Sorkar sikul hi tlachhe lutuk hi engtin kan khai chhuah ang tih han sawi ve teh. Tunah hian Aizawl khawpuia Primary sikula naupang lut hi zaah sawm hnih pawh an tling dawn em ni? Veng hrang hrangah hian sikul class pakhatah naupang panga te, pathum te, pahnih chauh te an awm tehreng a nia! Chuvangin, a ti theitute chu chet chhuah a va hun ve. Kei chu tih dan thar ṭha sia kan thlak danglam vat hi a ṭul hle tawhin ka hria.
- C. Lalneihlima, BVT