Nirmala
Pathianni kal ta khan sorkar laipuiah Minister 9 lak luh belh an ni a, chung zingah chuan Cabinet Minister thar zingah Minister of State for Commerce, Nirmala Sitharaman a tel a, Cabinet-ah hlan kai a ni ve mai a, thil mak engmah a la awm lo. Hna chanpual an sem erawh chuan he Tamil nu, kum 58 mi hi Defence Minister a ni ta daih mai a, tun ṭuma sorkar siksawia thil mak bera ngaih a ni ta huai huai a nih hi.
India ramah hian Pi Indira Gandhi, PM a nih lai khan Defence hi a lo enkawl tawh a, chumi hnuah hmeichhe kutah Defence Ministry hi dah a la ni leh ta lo a ni awm e. Nirmala hi Tiruchirapalli (tun hmaa Trichinopoly kan tih ṭhin kha) khua a ni a, he khuaah hian President hlui pahnih - R. Venkataraman leh APJ Abdul Kalam pawh khan lehkha an lo zir tawh a, Pathianni pawh khan he khaw mipuite chu an hlim hle a ni. Keini pawh ni ila kan hlim ve ngawt ang!
Sorkar laipuiah hian Ministry pali - Home, Finance, Defence leh External Affairs hi a pawimawh zuala ngaih a ni kumkhua a, tunah pawh a dang pathum chelhtute chu an mi lawk leh langsar - Rajnath Singh, Arun Jaitley leh Sushma Swaraj-i an ni a, Nirmala Sitharaman-i hi kum 2014-a Minister of State a nih pawh khan MP pawh a ni lo nghe nghe. Tunah hian Karnataka aṭangin Rajya Sabha member a ni a, Defence meuh chantir a nih leh tâkah hian, kan PM leh BJP President, Amit Shah hian amahah hian hmuh an nei ni ngei tur a ni. Ani nen hian, Bible ṭawngkam takin, ram hruaitu chungnung, a thiltithei zual tlemte telna (elite ministerial group) Cabinet committee on Security (CCS) an tihah hmeichhe pahnih, Pi Swaraj-i nen hian an tel dawn ta a ni.
Jawaharlal Nehru University aṭanga MA leh M Phil (Economics) zir zo, tun hma deuha BJP thupuangtu 6 zinga pakhat a ni ṭhin a, amah a fel leh a tlin chu thu dang, PM hian chhim lama bu khuar ngheh a tumna a nih tel pawh a rinawm a, thil hria leh fing tak, ṭawng dan tâwk leh sawi tur chin thliar thiam tak a ni e, an ti. Sipai chi thum - khawmual, lawng leh thlawhna sipai hotu lu - General, Admiral leh Air Chief Marshall te hotu tur, anni meuhin chibai an bûk tur chu, a satliah lutuk lo ang tih a rinawm a, kan chhehvel - China leh Pakistan lama thil awm dan te, Asia chhim chhak bial boruak leh khawvel puma thil awm dante theihnghilh hauh lova he dinhmuna dah a nih miau avang hian, an tisual palh lo ang tih a rinawm viau.
Mak angreng tak chu, Nirmala hian kum 2006 khan BJP hi a zawm a, a pasal, Dr Parakala Prabhakar chuan 2007 khan filmstar, Chiranjeevi-a din, Prajarajyam party a zawm ve ngat a ni awm a, mahse a tui zui ta vak lo a ni ang. Hemi hma, kum 2000 chho velah khan Dr Prabhakar-a hi BJP Andhra Pradesh unit thupuangtu a lo ni tawh reng a, Nirmala hi BJP-ah a tlatlum chho zel a, Nitin Gadkari, an party President a lo nih khan 2010 March thlaah party thupuangtute zingah a tel ta a, Narendra Modi nen pawh an inhre hnai ta zel a, Delhi lam aiin chutih laia Gujarat CM, Pu Modi-a state lamah a lar zawk mah a ni mai thei. A pasal nen hian JNU-ah an intawng a, a pasal te chhungkua hi Congress lam mi an ni a, a pasala nu hi Andhra Pradesh-ah Congress MLA a ni tawh a, a pasala pa phei hi chu 1970 chho-ah khan Andhra Pradesh-a Congress sorkarah Minister hial a ni tawh.
A pa hi chhungkuaa thununna lek khauh tak a ni a, a nu chu lehkha chhiar taima tak a ni. Kum 1991 khan nau a pai laiin, an nupa-in UK aṭangin India ramah an lo haw a, May thla khan nau nei turin Chennai an pan a, damdawi ina a awm laiin Rajiv Gandhi kha thah a nih avang leh, an thahna hmun kha Tamil Nadu-a Sriperumbudur a nih avangin, a nghawng buaina chhuak avangin damdawi in pawh a chhuahsan thei lawk lo nghe nghe. Fanu pakhat an nei a, Hyderabad-ah an khawsa nghet chho ta a ni.
Kum 2003-05 chhung khan National Commission for Women member a ni a, khatih lai khan Sushma Swaraj-i nen hian an inhre hnai zual ta a, ani hian BJP-a lût thûk zel turin a hmin a nih hmel viau a, tunah phei chuan sorkar laipuia hna pawimawh ber pakhat a chelh ta a nih hi. Hmeichhia-in min veng ta a, kan him ngawt ang paho chu!
- RK Lianzuala