Vai sumdawnna vs Chakma doctor
Hman ni khan ka ha hawlh zawng tak mai an rawn ziak hlauh mai a, tui hnih ngei hi ka batah ka ngai. Vai dawr ngaimawh nachang hre lo khawpa ngawng tawh Mizote hian Chakma hi kan zuam tawk lek an ti ta em ni?
Khawvel ram inchim ral hi en ula, ram khata an lo luh ve vanga inchim ralna lam hi ka la chhiar fuh lo. Ramah an lut a, an ei bar zawnaah an intulut a, an sumdawnnaah an tel ve a, a tawpah sumdawnna vawn fung chelhin a ram neitute ei ai an ei ta zel a, an lo lian a, ram neitute an te a, tichuan economic assimilation chu inchimralna lian leh hlauhawm bera ngaih a ni.
Aw Zoram, harh teh. Chakma i zuam a, Chakma i cho a, i inhrosa dup dup a, Vaiho hi an nui asin. Vaiho, kan contract lian apiang chuh zo a, supply lian tham chang a, kan sumdawnna lian thama kan ‘partner’ ni zo tate hian Chakma kan bei ang a, Vai kan hlamchhiah ang tih hi an duhthusam asin.
Dik tak chuan Chakma pahnih thumin doctor an zir hi hnawk viaua kan ngai a nih chuan, hman ni lawka Mizo hming hawh dera Vishal kan tihte VAT Registration a vaipa hming lo lang leh daih si te kha kan sawi rei ngam lo em ni? Tun ang zela kan kal chuan vai sumdawng liante hian lo luh an chak vek ang a, kan bawr dan huam huam en hian an lo la lut nge nge ang. Chakma dotu CYMA leh MZP-te pawhin Vishal etc chu an do rei ngam lo, a chhan chu mipuiin ‘a tlawm’ kan um vang a ni a, nakinah chuan heng vaiho hmaah hian tuna ‘a tlawm’ umtute ngei hi kan la ‘tlawm’ ve ang ti nia.
Chakma hi chu kei ka hlau lo. A tam zawk lehkha thiam lo an ni. Sumdawnna an luhchilh ve lo. Chakna hi sumdawn thiam an ni lo. Supplier leh contractor lian an nei ve lo. Chief Minister leh Minister-in an tlawn ve lo a, an intilawm tawn hek lo. Chakma aia hlauhawm chu Vai sumdawng an ni.
Vai sumdawnna leh a kaihnawih zawng zawng hi MSU, MZP leh CYMA hian hma ngam rawh se. Supply, contract leh vai sumdawnna ṭhenkhat aṭanga ‘ei’ an neih vang hian kan zirlai pawlte pawh hi an ṭi duk tawh zawk em ni le? Ka hre ve lova, a hriate chu an ‘confi’ khawp asin. CYMA tal hian Vai sumdawnna hi titawp ngam se, mipui an lawm lo a nih pawhin khuareia ram leh hnam humhalhna pawimawh a ni tih kan la hriat chhuah dawn avangin tunah hian vai sumdawnna hi hmachhawnin bei rawh se. Hei hi ram leh hnam humhalhna tur pawimawh bera ka ngaih chu a ni.
Ruihhlo te, Chakma te hi chu a lera thil awm ve lekah ka ngai a, kan ei bar zawnna vawnfung chelh tum ran vai sumdawngte hi kan bitum chat a hun ta, an thurualpuitu Mizote pawh hi mualpho rawh se, kan ram tan ke pen a hun ta e.
- Vanlalsawma