POLLUTION TEST-NA HMANGA MIPUI HREMNA HI

A va hahthlak ṭhin tak em! Mipui sum lak kan tum a nih chuan, a lak danah mipui tana awlsam kan zawng tur a ni dawn lawm ni? Tunlai chhanah Electric bill te, Tui bill te pawh mipui intlar put put ngai tawh lovin online hmanga bill pekna kan buatsaih tawh a, bill pek a awlsam tawh tehreng nen. Pollution test erawh chu online hmanga tih chi ni ve lo mah se, hei aia awlsam hi a awm reng a, kan ti ve duh tlat lo mai hi engnge a awmzia ni le?

Pollution test-na kan neih dan: A zawng zawng ka hre vek lo, Aizawl leh Lunglei-a kan neih dan aṭang ringawt pawh hian, mipui insawpna lian tak kan hmu nghal, Aizawl-ah Pollution test-na hmun thum (3) a awm a, ni khata test theih zat aṭanga chhutin, kumin chhung zawng hun kan mamawh ang an ti. Lunglei-ah test-na pakhat chiah a awm a, Saiha leh Lawngtlai district huam chhunga lirthei awm zawng zawng he Pollution test-na pakhat chauh hi an intawm nia maw le!

Mipui minsawp dan: Hmun danga mipui kan sawp dan chu ka hre lo, Lunglei-ah erawh buai mep mep tak kan ni. District 3 huam chhunga lirthei zawng zawng test-na pakhat chauh a awm avang hian, nileng lengin kan intlar put reng mai a, lirthei pakhat chauh test tur pawhin ni khat hnaa neih tawp a ngai, hun thawl nei ve lo tan phei chuan buaithlak tak a ni. Thingtlang aṭanga lirthei test tur lo kalte tan hlei hlei hian a buaithlakzia chu kan hre thiam mai awm e. Test tura kal, hun neih tam loh avanga vawi thum kir leh ta pawh an awm nuk tawh.

Kan insawi thiamna: Sorkar-in a chawitir dawn tih thu an chhuah veleh test-tir kan tum a, hun dangah test-tir kan tum lo va, kan inhnawh tut tut phah a ni kan ti. Hei hi a chhan a awm alawm, Pollution test hi hnaa nei peih kan awm vak lo. Test-na hmun pan vang vang ngai lo va, Petrol/Diesel thun paha test theih reng, hmun dangah a test-na kan dah tlat a, kan pan peih lo a ni ber mai. Thu awih loh vang pawh a ni lo, a system fuh loh vang zawk a ni.

Mite chuan...: Kan sawi kan sawi tawh, mi state-a an tih dan kan hmu ve vek a, Pollution test hi hnaa neih pawh a ngai lo. Petrol pump leh kawng sir thawl deuhah Motor Van an dintir a, an test zung zung mai a ni. Pollution test vanga inhnawh tut tut an awm ve lo. Vah vel paha thil tih tawk leh hi Mizoramah chuan hnaa neih a ngai tlat mai.

Mipui chuan thu kan awih: A dawhthleng siamtute thiam loh zawkah hian mipui min dem lo teh u. Mipui chuan thu hi kan awih lutuk, Sorkar-in tih tur a tih chu kan zawm dual dual zel, Electric bill leh Tui bill kan pek thatziate hi, mi state nen chuan inthlau tak kan ni. State ṭhenkhatah chuan Ellectric bill Rs. 1,00,000/- chuang ba te an awm a, chung ba neite chu thing turin NGO lamin inhlawh nana hmangte an awm asin, a system fuhnaah chuan Mizo mipui chuan thu kan awih lutuk. Pollution Test pawh hi a system fuh sela, hetiang hian kan buai em em lo tawp ang.

Dawn tisei: Kan Chief Minister berin kan boruak tha hi Delhi-a zawr tham nia a sawi laiin, hetiang boruak ṭha nei siah, phai lama industry lian pui pui awmna, boruak bal lutuk nena inhrut rual chi pawh a ni emaw ni? Mipui pawisa khawnna remchang a nih vang mai mai a ni zawk em?

- Lalrinliana Colney