Kawng chhia leh thingtlang pa titi

Hnêawm khawpin kawng chhiat thu hi kan sawi mai dawn a nih hi. Kan kal a, kan phun kan phun lo thei si lo va.

An sawi Mamit khawng chu kan zuk zawh ve ta ngei a, kan kal hmain kan kawng zawhah chuan, Aizawl-a a fapa ruang hmuh hman ngei beiseia lo kal, kan rawngbawlpui chu, YMA ṭanpuina nen, kal theihna awm ang ang dap khawmin, an lo thlen dawn ṭêpah, Rangvamual traffic jam in la dang cheuvin, Sakawrtuichhun lamah kea rawn kalpuiin, a fapa ruang a rawn nan hman hram thu ka'n hre hmasa te te a.

Kawng ṭha pangngaiah darkar nga lek kal ṭhin kha, kan zawh tur chu Mamit khawng a nih miau avangin, zing dar 6 ah Aizawl kan chhuahsan a. Sairang thlen hmain kan han tang phawt a, kan chuanna motor tê a nih avangin engtin tin emaw kan inhai chhuak hlauh a, Police fate School kal tur Sairang lam aṭanga lo chho bus kha chu, a tlang mai dawn lo, khang naupangte kha an kirpui leh mai loh chuan, kawng dang a awm lo a ni.

Airport road aṭangin kan peng chiah a, khawthlang lam kawng laih avangin kan leu thla zek zek ta mai a, kawng ṭha lai thlang reng rengin kan insawh tla zel a, Dampui khaw thlen hmain lei nâlah motor an lo nawr laih laih ta mai le. Chu chu an nunphung a nih tlat avangin, ning hmel reng pu lo vin, an inpui liam liam a.

An tânna ṭhin chu lung nawi hnawh khaha tlang mai thei a ni, leu zek zek a kan tlan avanga kan khawmuanna pawh kha, lung nawi dah khaha ziaawm thei mai chu a ni. Mahse viltu nei lo kawng khawhar tak chu khuti khuan an phunpui reng mai dawn chu a nih khu.

Kan zin lo haw lamah, kawng chhiat avangin Sumo service an nuar a, an nuar har hle zawk a ni. Eng tak rawn nuar chhuak ang maw le.

An titi chu: Thingtlangpa titi ka dawnte chuan, kawng ṭha ma­mawh­na bawkah min hruai lut leh zel ṭhin. Bawkbawn leh samṭawk hmun an siam a, Tripura lamah an hralh ṭhin, mah se tunah chuan phurtu an awm loh avangin, an beidawng titi chu ngaihthlak a va nuam lo em.

Gas pawh June thlaa mi kha an ring ngat ngat a, daih ngaihna awm ta lo chu, mei an chhem khu vut vut tawh mai, Lengpui-ah black in Rs 1200 a lei tur awm pawh an inchan lo. Mizofed gas connection an ring a, supply-tu an awm lo a nih chu maw le! Sumdawng motor dang chu harsa takin an tlan hram hram a, sorkar rimnam department erawh chu, an kawng enkawl lovah an tlan ngam lo a ni awm e.

Kan titi zel a, NLUP vawkte pawh kha an lo dawng ve ngei a, a in tur thingzaia lo rel turin thupek an dawng a, thuawih takin thingzai chu an lo rem khawm a, kum khat leh a chanve hnuah chauh a chung khuhna tur Rangva an dawng a, an thingzai chu a lo mawih hman tawh, mipui rilru an ti beidawng a, hlawhtlinpui tum tak tak an awm ta meuh lo a ni.

Rubber an chintir a, kum sawm chhung ang nghak puiting a, department rubber sem chu a suak te a lo ni a, a hnai dan lah chu training petu an awm leh si lo, a chin laiin training an pe a, a lo puitling a, enkawltu department an lo thlak hman a, kum sawm chhung zeta an nghah chu, beidawnna ruamah an ṭang mek a ni.

Lakhuihthei huan an siam a, a kungte chu a ṭha ngang mai, a rawn rah taa leh, kawng chhiat avangin a phurhnaah an buai leh ta. Kalkawngah a sawh chhiat dawn avangin phurh loh law law kha a hlawk zawk.

An va khawngaihthlak em: Thingtlang mite nun a taka hmuhpui chuan, khaw­ngaihthlak tak an ni. Mizote hi hnam thatchhia kan ni lo asin, thawh rah hmuh tur a awm phawt chuan, a rah chu beiseiin, hahthikulin kan thawk peih tih hi dawt a ni lo.

Thawh rah zawrhna hmun te, lakkhawmna hmun te, kalkawnga a chhiat hman loh nana kawng ṭha sialtu, rintlak sorkar lo piang tawh ni se, chu baka Zoramthar chu a awm dawn em ni.

Kum tin lo neih an bansan chu, hmalakna tharin an bei a tih dawn leh si avangin, an bu ngaia let leh an awm nual ta mai. He thingtlang pa titi hian, sorkar muthlu hi kai harh lul teh se.

- Lalrinliana Colney