Ramngaw chung chang
Hman deuh khan Zonet TV-ah buh seng lai vel te kha an rawn tilang a, hmanlai kan pi leh pute buh ngahten an tihdan te kan lo hmu a, a lawmawm khawp mai.
Amaherawhchu, khang lo atana an neih ram zau pui pui ramngaw an ṭhiat han hriat erawh kha chuan rilru a na ngawih ngawih a, engtikah nge khang ramngaw thing leh maute kha an rawn sei len leh theih ang tih chu dam rei thil nghah a ni a. Khang kan lo neih te khan ram sik leh sa nasa takin a tidanglam a, Mizoram chu phulah kan chantir mek a ni si a.
Ram kan tichereu a, kan intodelh tak tak thei chuang si lo a, a pawi tak tak a ni. Tunah hian a rah chu kan seng mek a, leimin, tuilian te kum danga kan hriat ngai loh kan hre chho mek a nih hi. Tlangram lo neih hi bansan a va hun tawh tak em!
Kan buh thar te lah chu kan ei zo leh mai si a, Punjab buh thar ramngaw tichereu tawh lote buh hi ei sen loh a awm a, hei hi ei i tum tawh zawk ang u.
Kan ram thing leh maute hi mihring nunna hnar a ni a, ramngaw kan humhalh a, ramngaw kan siam belh zel a, ramsa te, sava te, nungchate chenna tur, ei tur te an lo nei leh thei dawn a ni.
Kan ram chhan nan, ramngaw tichereu lo zawnga eizawnna mumal leh hlawk zawk kan lo neih theih nan he article tawite hi ka rawn thawh ve a ni. Kan la tlai lo ve.
- RL Mangzika, Mission Veng