Vai sumdawng tih kha
Khatia Vishal dawr an hawn dawn khan MIMA khan nasa zetin an dodal kha a ni a, tunah chuan dodalna awm lovin a kal tlang ta a, hei hi dan phal loh nia ngaih kha dan phal a lo ni leh ta si a nih chuan MIMA kha an ti dik lo a ni.
MIMA ṭanna kha a dik a, Vishal kha hnam dangin Mizo hming an hawhna mai mai a nih si chuan, MIMA an ngawi ta tlat maite hi mak deuh chu a ni. Mak deuh dang a la awm a, MIMA lamin Vishal dawr tumtute dan an tum thu an chhuah a, mah se VISHAL dawr awmna Bawngkawn lam khan an lo phal awzawng lo mai a, mak leh ta vak lo ve thung chu Bawngkawn football team-in veng veng football inelnaah Vishal hming chuanna an rawn ha ta kulh kha a ni.
Keia sawi tum leh vei chu Bazar India a lo inhawng thar ve ta a, MIMA aṭanga dodalna thu reng reng a awm ta lo. MIMA hian, “Awmzia a nei lo, mipuiin min thlawp lo,” tiin an titau ta em ni le? MIMA hian an ṭanna kha, “A lo dik hleinem, Vishal kan lo do kha dan kan lo bawhchhe zawk a ni, kan ti dik lo,” an ti ta zawk em ni? MIMA hian Bazar India lo inhawng thar ve hi an vei peih tawh lo nge ni a, an vei lo hrim hrim? tih zawhnate hi ka lo inzawt ve mek a ni.
Ei bar zawnna kawnga inluhchhuah a, inhneh chhuh a, inlan hi a tluka na a awm lo ve, an ti ṭhin khan ka hria. Tuna sumdawnna hlawm lian tak tak lo chhuakte hi chu kan rama sumdawng tam takte vaw chhetu tur an ni tih a chiang a, an sumdawnna volume a inlen hleih avangin a in tlawm hleih ngei ngei dawn. Mipui hi chu consumer mai kan ni a, a neitu vai a nih leh nih loh lam kan ngaih tuah dawn lova, a tlawm lam kan um dur dur mai dawn a ni.
Tuna kan thlen chin en hi chuan, hman ni lawkah Vai hminga sumdawng tiin dawr lian kan do a, chumi tluka dawr lian a anpui a lo piang a, kan pawm ta a nih loh pawhin a do zawngin tumah kan au peih tawh lo chu a ni ta.
Ti zel chuan vai dawr lian hi Mizoramah 20 a lo luh meuh chuan kan Mizo sumdawnna chu a nek chep ang a, Mizote hian Vai thil hlir leiin Mizoram hi Vai mi lian sumdawnna leh sum inchuhna a lo chang tawh ang. Tuna a tlawm um Mizote tan chuan a tlai tawh dawn a ni.
- Lalrinliana