MZU BUAINA CHUNGCHANG
University hnathawh ṭha taka a kal theih nan MZU Students’ Council thil phut chu Vice Chancellor dah ngheh thuai a ni a. September ni 6 aṭang khan University gate puiah hnathawktute an dang a, class leh office hnate a kal thei ta rih lova. VC nghet kan neih hnuhnun ber term kha May 18, 2016 khan a tawp a, chumi tlai dar 3:00 velah chuan a hun pawh seina order a lo chhuak a, February 28, 2017 thlengin Vice Chancellor hna a chelh zui ta a ni. March ni 1, 2017 aṭang khan Proffessor senior ber hnenah charge a hlan a, tun thleng hian VC nghet lovin kan awm ta zel a ni.
Acting Vice Chancellor hian hna thar lak, regular appointment of teachers and staff leh statute khawih thil, dan siam ṭhat, amendment ngai ang chite chu a ti thei lova. A tih theih loh thilte chu tiang hian chiang taka ziah lan a ni a, thil dang zawng zawngah chuan V.C thuneihna a keng vek tho a ni. Duhthusamah chuan a nghet ho ngeia awm a, hma lak thuai thuai theih a chakawm khawp mai.
Amaherawhchu, regular appointment emaw policy thar emaw ti kher lovin thawh tur tam tak a awm tho mai. Hna indaih lohna laiah chuan contract leh MR pawhin a hnawh khah theih a. MZU hi post hnawh khat ṭha berte zinga mi a ni nghe nghe. Office hna kal pangngaiah (routine matters) chuan buaina em em tur a awm lo. Hman deuh tawhah pawh khan Prof Miri kha acting V.C-in HEHU-ah kum 5 dawn lai mai a ṭang a, an buai lem lo ni tain ka hria.
MZU VC thlang tura (interaction) ṭhut an neih hma thla khat velah khan Nagaland leh Tejpur university VC tur pawh interaction neih pui tawh niin an sawi a, a la chhuak bik lo a ni awm e. A tirah khan MHRD hmalakna kha a rang khawp mai. Kum 2016 June thlaah kha chuan MZU VC tur atana an thlan chhuah panel pawh an peih vek tawh a nih kha. Chutih lai chuan Mizoram sorkar lam aṭangin central-ah lehkha thehluh a awm tak tlat avang khan Panel-a an chhawp chhuah candidate pakhat a inhnukdawk ta a. Chuvang chuan MZU VC thlangtu ‘Search Committee’ thil lo tih tawh zawng zawng chu cancel a ni ta bawk. A tharin search committee din leh a ngai a, tun hi kan thleng ta a ni zawk e.
Zofate zirna sang neih chhun university hi kal sual lo hram se kan duh a ni. Mahnia ro in rel (autonomous body) a nih anga thuneihna sang tak a neih pawh hi kan hmang ngam tur a ni. University chhung lam chanchin hre lo tan phei chuan tunah hian VC nghet a awm loh avangin hnathawh theih a ni ta lo emaw tih mai a awl ang. Acting VC hnuaia kan awm avanga buaina em em tur a awm lo ve.
Tuna zirlaite thiltih hian Central Sorkar a koh ei vat chuan a lawmawm hle ang. An ngaihsak phah chuan lohva, hmalakna hmuh mai tur a awm loh chuan a tuartu chu keimahni bawk kan ni dawn a, a bik takin zirlaite an ni dawn si a. Semester system-ah hian ni li ni nga vel hloh pawh hi uihawm tak a ni tih ngaihtuah chungin an hmalakna hi kalpui se a ṭha ngawt ang.
- Prof. T.C Nunga