KHAWL HNAWNG

Fak tlak MLA

Mizoram a bikin chhimlamin an mamawh em em hri Test-na khawl chu Lunglei Civil Hospital a hman turin Congress MLA, Pu Zodintluanga chuan a chah thleng rup mai. Hei mai ni lovin he khawl bunna tur hian Hospital Laboratory chu chei ṭhat emaw sak thar emaw a inhuam thu a sawi bawk a, thil lawmawm tak a ni. Politics khelh nan an hmang a nih pawhin thu lawilo sawi mai mai ai chuan hmanraw ṭha takah ka la ngai cheu a, mipuite chhawr theih zawnga Politics khelh hi khelh chhan tur zawk niin ka hre hial. 

A hnawng titih

Khawl chu DC-ah lawm taka hlanin lawm takin an lo dawng a. DC Office-ah hmanna tur awm hek lo, a tum hmun tur Hospital lamah an dah phei nghal a, lo dawng ve maiin Blood Bank-ah dah ṭhat nghal a ni a, reilote ah Hospital thuneitute chuan thudang an dawng nge ni DC Office-ah bawk an dah phei leh ta a, chhim lam mamawh em em khawl chu a hnawng kual ta mai mai zawng a nih chu.

Khawl kalkawng

Ka lo chhût ve naah, Congress MLA hian Lunglei DC leh Hospital thuneitute hi a hmalam daih tawh khan khawl chungchang hi a lo sawipui tawh a. Sorkarin lo hriain chah thlen an tum mek chu Lunglei lam ta tur tih a awm loh laiin hmanhmawh takin Lunglei Civil Hospital a RT-PCR khawl bun dan turah Expert Team an tir phei ve ta rum rum a. Hemi hnu lawk hian a chah aṭanga kar khatna lekah khawl chu a lo thleng ta mai a, a va hlan ta hmiah mai ni awm tak a ni. 

Hri leng leh Damdawi in thil pek

"In sawisel hun a ni lova ṭanrual hun a ni" kan ti dum dum a, sum fai dawn chu kan harsat lo hle a. Congress MLA te May thla hlawh Rs. 400000 pawh kha khi sángin i he lovin kan dawn sak mai a, khawl kher kher hi chu khi sánga dawnsak kan harsat ta riau a. Khi sanga kan sum dawn aṭang chuan kar khat leka chah thlen theih khawl hi kan chah thleng ṭha duh bawk si lo! Rim taka thawktuten test chak theih loh vangin dem an hlawh zawmah lek lek tawh bawk si. 

Damdawiinah hian thilpek hrang hrang, ṭhuthleng sei, dawhkan, hand sanitizer, glove, damlo tan ei tur eng pawl pawl emaw ten kan pe zeuh zeuh bawk. Thisen hial a thlawnin kan pe ṭhin a, heng hi Damdawi in thuneituten lawm takin an lo dawng mai a, damdawi in hian sorkar pawmpuina lova thilpek an dawn hi a tam zawk a ni hial ang. 

Hri lengin min nuai laia kan mamawh ber mai thilpek an dawn turah Sorkar pawmpuina hmuh loh vanga a kawl eih pawh an ngam lo hi chu 'turtu' lian tak a awm a ni ngei ang! 

Khawl hi...

RT-PCR hi a tirah neih harsa em emin an sawi a, a man pawh tam tak niin an sawi. Sorkar hian lei belh zung zung se kan tih luai luai laiin chah thlen a harsat thu leh khawl bun tura Laboratory changtlung, Indian Council of Medical Research (ICMR) pawmpuina lak thlap ngai bawk tiin kan sawi harsa thiam hle a, mahse kar loah Assam pawhin ni khatah sample 10000 an en thei mai a. Arunachal leh Nagaland lahin an bun thluah thluah ta bawk a, hri leng boruak hria-in ICMR lam pawh strict hlei thei lovin a khawl bun theite chu hriatthiamna thui tak nen a phalrai zui viau tih kan hre ta zel a. 

Delhi a khawl 41 teh meuh bun tawh pawh ICMR hi a la tlem a, bun belh turin a ti hial zawk a ni. 

Chhim lam tan...

Lunglei chauh ni lo, Hnathial, Lawngtlai, Saiha lam thlenga ṭangkaipui tur he khawl hi Politics ball muma chantir a, pet kual mai mai tur atan phal chi a ni lo. Politics lama lalut lo hian mamawhna zawna hman a nih thuai theih nana hmalak zawk a ṭul hle a ni. 

In sawisel lova ṭanrual hun a nihna chu ruling leh ling lo mipui thleng hian lanchhuah tir a va ṭha em.