ZU AIA HLAUHAWM ZAWK

Kum 1925 khan Hindu kulmuk hovin Dr. Hedgewara hovin Rashtriya Swayam Sevak Sangh (RSS) pawl hi an lo din tawh a, an tum ber chu India ram chu Hindu ram, hnam pakhat, nungchang pakhat (HINDUTVA) hnuaia awm vek a, hnam tenaute humhalhna dan tesep pawh paih vek a, zaikhata luan khawm vek a ni. Chutiang duh lotute chu ram pawna hnawh chhuah a, a ṭul chuan tharum pawh hman mai an duh a ni.

RSS hnuaiah hian pawl tesep 60 zet an awm leh a, chung zingah chuan pawl member nuai 10 aia tam nei pawl 20 vel an awm leh a, chung zinga ṭhenkhatte chu:-

1. BJP - member nuai 170 chuang nei.

2. Akhil Bharatiya Kisan Sangh - member nuai 45 chuang nei.

3. Akhil Bharatiya Mazdoor Parishad - member nuai 23 chuang nei.

4. Adivasi Kalyan Kendra - member nuai 18 chuang nei.

5. Adhyapak Parishad - member nuai 18 chuang nei

6. Vishwa Hindu Parishad - member nuai 30 vel nei

7. Janata Yuva Morcha - member nuai 18 chuang neite

an ni hlawm. Heng pawl hrang hrangte hi HINDUTVA atchilhtute vek an ni. An vaia hmingah hian SANGH PARIVAR an inti a, hun lokal zelah JAN SANGH tia hriat an ni leh a, chuta ṭang chuan Janata te, Janata Dal te leh BJP te hi a lo piang leh a. Tuna India rama Sorkarna siamtu BJP chu a lian ta ber a ni.

Kum 1947-a India a lo Independent khan hnam tin leh sakhaw tinte zalen taka an awm theihna ramah duan a lo ni ta hlauh mai a, RSS ho chuan Hidu Lal bikna (HINDUTVA) a siam tumin a bei ngawrh sauh sauh mai a, India hnam pa Pu Mahatma Gandhi-a pawh kha Hindu sakhaw tana mi hnawksaka puhin an kaphlum ta a nih kha. Chutichuan, India Independent hnuah Kristian pawh kan lo pung chak ta zawk reng a ni.

BJP leh a thurualpuite an sorkar loh lai chuan RSS leh a ṭhuihruaite hi an zalen em em lova, an duh anga chetna remchang pawh an hmu ṭha thei ngai meuh lo a ni. Kum 1964-1999 chhunga United Christian Forum for Human Right (UCHFHR) in a chhinchhiah dan chuan India ramah Kristiante tihduhdahna lian tham vawi 108 awm angin a tarlang a, chung zingah chuan RSS leh a ṭhuihruaiten BJP sorkar thla 13 chhunga zalenna an neih tak avanga Kristiante tihduhdahna an siam chu vawi 80 chuang lai mai a tling hman a ni. Tuna BJP sorkar leh hnua mite nen phei chuan vawi 100 chuang teh meuh Kristiante tihduhdahna hi a tling tawh a ni.

Kum 1998, February ni 19 Thursday a MIDDAY Chanchinbu, New Delhi chhuaka B.P. Acharya, Secretary BJP North Eastern States Co-ordination Council-in AB Vajpayee hnena lehkha a thawna Kristian states a an hmalak dan a sawi chu:-

“Kan thil tum ber Hindu Feikibar (Trishul) a Isua Krista awm chhun tlang chu kan hlen ta,” tih te, “He Kristian Sakhaw bawlhhlawh (unholy christianity) hi kan nuai bo vek theih nan India hmarchhak rama Kristian tamna state Mizoram te, Nagaland te, Manipur te, Assam te, Arunachal Pradesh leh Tripura-a Kristian tamna bialah te hian hetiang hian ti ve ila a duhawm hle ang. Sum leh pai lamah harsatna kan nei lova, ruahmanna ṭha tak kan mamawh chauh a ni. State leh Central sorkar hnuaia Hindu hnathawktu min thawhpui duh apiangte chu a hlawk thei ang bera hman ṭangkai kan tum a ni,” tiin.

Kum 1999 MP inthlanah khan BJP chuan sorkarna siam thei dawn lova a inhriat avangin May ni 15, 1999 khan National Democratic Alliance (NDA) chu a din ta a nih kha. India hmarchhak bik tan North East Democratic Alliance (NEDA) tiin a hming hi an vuah bawk a. Hetah hian MNF Party pawh a tel ve nghe nghe a ni. He NDA a tel Party te reng reng chu BJP thununna hnuaiah an kun ngei tur a ni ang. Lal duh ngawr ngawr avang leh sum leh pai um luat avanga Hindu lalram siam tumtute an ban tha tichak lehzual tura Kristian zaa za inchhal ngam Mizoram state aṭanga Party ṭhenkhat an awm hi a pawi takzet zet a. Mizo Kristian mimal tinte hi an hmanrua ang chi reng rengah i ṭang lo hram ang u.

India Danpui innghahna lungphum (Preamble) Sovereign, Socialist, Secular, Democratic, Republic te chu BJP Sorkar hnu reiloteah nasa taka sawinghinin a awm a. Sakhaw zalenna dan ‘secularism’ chu Lok Sabha-ah BJP chuan paih tumin 45th Constitutional Amendment Bill an pu lut a, India Danpui aṭanga paih turin an passed a ni. Amaherawhchu, Rajya Sabha-ah sakhaw zalenna dan ‘secularism’ chu Congress Party-in paih an remtih loh avangin paih a ni ta lo a ni. BJP hi Lok Sabha leh Rajya Sabha-ah hian hneh takin sorkarna siam ta se, sakhaw zalenna dan ‘secularism’ hi paih a ni ngei ang. BJP sorkar-ah hian kan sakhua hi a him tawk i ti em? I sakhua ber a him loh chuan i ram leh hnam a him thei lovang; Mizo Kristiante tan chuan hei hi chona lian tak a ni.

Kei zawng rawngbawltu ka ni si a, he bus-ah hian ka lo chuang laklawh tawh a, chuanna thlak thlak chu ka tan a mawi lo ve i ti a nih chuan i chuanna bus khan kawng dik lo a zawhpui mek che chuvangin ‘... of the east’ emaw ka pan i tih lai khan ‘....of the west’ ah i thleng ang. Lo chhuk thuai la, secularism bus-ah hian i tum ram thleng turin hahdam takin chuang ve mawlh ang che.

Khawvelah hian sakhaw inchimralna ‘Religions Assimilation’ tluka hlauhawm a awm lo. Sakhaw indona hi khawvela indona rapthlak ber leh hlauhawm ber a ni si a.

- J.M. Vura, Saron Veng, Aizawl