Motor intlanchhawk hi ti ngei rawh se

Mizoram sorkar chuan khawpui chhung traffic jam nasa lutuk chu mutmawh hnar mawhah a nei ta a, a lawmawm khawp mai. Lirthei pung zelah kawng a lian zel si lo a, tunah hian lirthei engpawh intlanchhawk tura a ruahman hi mipuiin kan thlawp a, ti pui­tling ngei rawh se.

Lirthei intlan­chhawk hi tunah hian taxi-ah an kalpui mek a, taxi neitu leh khalhtute pawhin hlawk lo deuhah inngai mahse; sorkar leh mipui tana thil ṭha a nih vangin ṭha takin an zawm a, an zawm zel turah ngai i la. Tuna lirthei intlanchhawk tura ruahmanah hi chuan anni hi chu a ngaiin kal zel pawh nise a awm viau a ni.

Intlanchhawk dan tur ruahmannaah chuan motor number tawp leh ni (day) anga kalpui tur a ni ang a, entir nan MZ-01/6607 a nih chuan ni (day)-a number 7 awmna zawngah khan a ding dawn tihna a ni a, October aṭanga intlanchhawk tura ruahman a nih chuan October 7, 17, 27 kha a din ni a ni ang. Chubak chu nitin zalen takin a tlan thei tihna a nih chu.

Mi ṭhenkhatin lir­thei intlan chhawk ruahmanna kal mek hi milian leh mirethei inkar tizautu angin an sawi fo ṭhin a, hei hi chu dikna chin a awm ngei mai. Mihausa chuan lirthei pali/ panga leh a aia tam pawh an nei ang a, an lirthei chu a hrang hrang nitin an hmang thei tihna a ni. Chu chu mirethei hian kan helh deuh ber chu a nih hmel; nitin an lirthei engemaw tal an hman theih bik kha chuan. Chutihlaiin motor pakhat chauh neiin a nei lo thik ṭalh thu a awm lo.

Khawvelah hian mirthei leh hausa kar a zau lo thei lo a, a nei lo tan chuan mihausa thawkrimte thawhrah kan thik ngawt thei dawn em ni? Miin thifa hnukchatin hna a thawk a, hun rei tak a ngaihtuah hnua remhriatna a neih ang kan nei pha ve lo a, chuvangin a hausa a ni ve mai a, kan thik ngawt thei lo ang.

Mizoram sorkarin sikul kal hun a sawn hma hnuah sikul naupangten traffic jam vanga harsat an tawh ṭhin tam tak chu sutkian a ni tawh a, kawng khatah chuan kan zangkhai phah ta viau a ni. Tunah hian lirthei zawng zawng intlan chhawk turin ruahmanna thar a nei leh ta a, he ruahman-na pawh hi a hlawhtlin hun a nghahhlelhawm a ni.

Hetianga lirthei intlanchhawk hi ram changkangah pawh an ching viau nia sawi a ni a, keini khawpui zim te-ah tiang em ema lirthei tam leh traffic jam nasa tihreh nan chuan kan tih makmawh ni tain a lang e. Thla khata ni thum din avanga buai em em tur chu kan awm ka ring lo e.

- Lal Rinmawia