Rupee - Paise!
Keini hna peng pakhat hi lehkha zir sang lo, sum thawh chhuah tuma Mizoram pawna hnathawh tum - tih fuh phei chuan, 'USA ah ngei le' tite hnena sapṭawng mawlmang te te leh Hindi thlenga zirtir a ni - hna awlsam lo zet a ni! Hna kawhhmuh lovin, ṭawng lam chauh kan lo hrut pui. Zirlaite ka lo titipui zui nasa ṭhin a, a ṭangkai chin phawrhchhuak teh ang.
Phone changkang duh ve tho si a, thil ṭha it ve tlat chuan mi chanai pawh pen sak chîng ta mai an awm ṭhin a, tuna ka sawi turte erawh hi chuan leilung dân mil zawng leh Pathian duh dân zulzuiin kawng harsa tak an zawh ṭhin. Chhan hrang hrang avangin zirna mumal tak an nei lova, lehkhathiam lo an ni! Lehkhathiam tam tak te ang thovin Mizoramah hian an mamawh phuhruk phâk hna an hmu bik lova, an sum dapna a hla lo thei lo! Mahse, Mizoṭawng bâk thiam hek lo le, thingtlang kawng chhe em em aṭangin hla taka khawpui chep zet Aizawl panin an rawn insawh luhai lut a, anni ang lo buaipui hi a luhai thlak ṭhin teh asin aw - luhai belhbawmin thil ṭha erawh a hring chhuak ve fo thung!
Anni ang hi buaipuitu nei lo, âthuai deuh roh an ni a, pawr fapin thui tak erawh hisap an nei - an zahawm asin aw! IAS nih tumte erawh coaching center ṭha kawhhmuhin sorkarin senso a tum sak tihte a ri ṭhin a, heng lehkhathiam lo rualho dinhmun aṭanga thlir hi chuan sorkar hi a fair lo tak zet!
Rev. Vanlalbela hindi zir nasatzia te fuihna thua ka'n hman tak tlauh tlauh hnuin, an zir hun chhung a zo a, an mamawh chu an pai ve tun tawh ṭhin. An reh vang vang a, USA aṭang ngei maia Apple an lei lai thlalak te min rawn thawn han hmuh chuan hnuk hi a ulh hial thei nia!
Ram buai zet, Myanmar aṭanga rawn chhuk Mizo ṭhenkhat hi an tum a va ruh mai mai ṭhin e aw! Zingah spoken english class an kal a, chumi hnu chuan nilengin kawng dungah thui tak tak vakin thil an zuar zui leh ṭhin. An zakzum a, an hawihhawm thung. Zirna hmun pan turin thawmhnaw an nei fum fê lova, inthlahrung takin an kimki chawih chawih nâng a - foreign-ah an liam thuai zel.
Mizoramah hian hna a vâng nasa mai si a, hna zawngtu lamin kan duhtui luat vang te pawh a ni thei ang. Aizawlah ngat phei hi chuan khawsak man hi a to fir fer hle. Mamawh a sang tulh tulh a, khawsak awlsam zawkna lamah hnathawk turin kan la inzui chhuak zel dâwnin a lang.
Aizawl pawn lama awm, kohhran leh khawthlang bel tlat, nangni lehkhathiamte khan tih tur pawimawh in nei a nia aw. In kohhranah emaw in khawtlangah emaw khan mamawh ngah ve tak, ṭhalai beidawnga indawm kun mêk, lehkha zir sang lo, harsa bawk si an awm ngei ngei ang. Ṭawngṭaisak chiam leh thil mak hrilh nghek aiin, Indian rupee thawk chhuak thei zawnga an ngaihtuahna her rem sak a, an rilru chhungrila an awh zawng te lei thei tura hnathawh tur an hmuh theih nan, sapṭawng leh hindi lo zirtir teh u. A harsa a nih paw'n, Mizoram an chhuah san hma, Aizawla an intuaihriam chhunga nun kawng dik an zawh theih nan lo fuih uluk ṭhin rawh u aw.
A bâk an hnathawhna tur kawhhmuh phur tak tak an tam, infimkhur erawh a ṭul a nia. Agency rintlak ngei pan rawh se...
- Tpa Bunghai