Mizoram sorkarin lirthei chungchanga dan thar a hman turah Pollution Test kalpui a nih dawn tak avangin lirthei neitute an buai hle a. Zing aṭangin Pollution Test tum lirthei ṭhahnem tak an intlar a ni. Sorkar hian mipui harsatna a ziaawm theih nan lirthei khu chungchanga dan kenkawh tur a pawtsei tawh a, mahse hei hian mipui mamawh a phuhruk lo hle tih chiang takin a lang.
Sorkar hian mipui harsatna a siam nasatzia hi a chhut lo emaw, a chhut lo lui emaw niin alang a. Lirthei khu endikna hmun siam belh chuang miah si loin, dan kenkawh a tum a. Tuna kan dinhmunah hi chuan lirthei khu endik tur hian intlar a ngai reng dawn tih hi an chhut duh lo niin alang. 
DTO-in a tarlan danin August 31, 2022 thleng khan DTO, Aizawl Office hnuaiah lirthei 2,23,866 a awm a. Lirthei khu endikna hi thla ruk chhung chauh a dam a. Thla ruk chhung hian ni 182 awm ang a ni. Lirthei khu endiktute hian, Pathianni pawh chawl miah lovin, nitin endik se, ni khatah lirthei 1230 an endik hman ziah a ngai tihna a ni a. Ni khatah darkar 8 zel thawk se, darkar khat chhungin lirthei 153 chuang hret an endik hman ziah a ngai tihna a ni.
Aizawlah hian lirthei khu endikna hmun thum­ah a awm a, heng hmunte hian darkar tin lirthei 51 an endik hman ziah a ngai a, minute tin pakhat deuh thaw an endik hman a ngai tihna a ni.
Lirthei khu endik hi dan kenkawh tur avanga tâwt leh intlar ngai angah mi ṭhenkhatin an ngai a. Mahse, a chunga motor zat leh an hnathawh hun chhung ngaihtuah hian, lirthei zawng zawng hian a khu endikna certificate nei vek dawn ta ila, tuna kan hmun hma leh endikna hmunte hian min zo lo nasa a ni. Thil pangngai ang pawn kalpui dawn ila, nitin intlar an awm reng dawn tihna a ni a. Sorkar chawlh, Inrinni leh Pathianni te a la awm zui bawk a. Sorkar hian an zawh loh tur ti turin mipuite hi min beisei a ni ber e.
Lirthei khu lamah kan khauh dawn a nih chuan a lirthei khu endikna hmun hi a hmain siam belh se, Aizawl chhung hmun 10-ah vel talte hian a test-na hmun siam se. Lirthei awm zat te chhinchhiah vek a ni a, ni khata lirthei khu endik hman zat turte chhut lawk theih vek a nih lai a, chhut lawk pawh awm lo leh, a test-na hmun siam belh pawh awm si loa hetianga mipui nawr vak hi mipui tana harsatna siam duh hrim hrim vang a ang a. SEDP atana sum tuak an tumna nia an sawite pawh hi a awiawm lek lek mai. Dan bawhchhia an man tam poh leh sum chawi tling khawm a tam mai dawn si a!
Sorkar hian mipui hmakhua a ngai a, boruak bawlhhlawh tur hi a vei tak tak a nih chuan a test-na hmun hi tam zawk siam belh se, chuti a nih loh chuan, tun dinhmunah chuan kan hmun neihte hian min zo lo a. Kuminah chauh ni lovin, nakumah pawh test tura intlar a, ni leng lenga hun hman hi a ngai reng tho dawn. Test-na hmun a siam belh duh chuang si lo a nih chuan, sorkar hi mipuite harsatna chhawktu ni lovin, mipuite harsatna thlentu zawkah a ṭang tihna a ni ang.
- Ramropuia