Rohingya te laka inven

Tunlaia Myanmar leh Bangladesh tena an buaipui em em chu Rohingya raltlante an ni. Myanmar sorkar mite an beih avangin Myanmar sorkarin beihpui a thlak a, mi tam tak chu Bangladesh-ah an lut a, heng mite avang hian Bangladesh leh Myanmar ram inkar a ṭha lo hle.

Rohingya hi vai kan tih chi tho, Indo-Aryan mi an ni a, Myanmar-ah hian maktaduai khat leh a chanve vel zet an awm nia sawi a ni. Muslim an ni ber a, an zingah Hindu tlem azawng an awm bawk. Myanmar-a Rakhine State, Chin Hills chhim lama state-a cheng an ni. Rakhine hi Arakan kan tih huam chhunga tho kha a ni. Myanmar sorkarin an zingah beihpui a thlak avangin sang tam tak chu Bangladesh-ah inhumhimna zawngin an tlan thla a, Bangladesh sorkar chuan an rama heng mite an luh hum hum avangin ramriah venhimna a tikhauh nasa hle.

Hetiang a nih tak avang hian Rohingya-te tan chuan tlanchhiatna tur hmun a tam lo sawt hle a, Mizoram lam an rawn pan mai pawh a hlauhawm hle. Manipur sorkar chuan an rama Rohingya te an luh lohna turin hma pawh a la ṭan nghal a, chutihlaiin Rohingya te chetvelna leh tlanchhiatna

aṭanga hnai zawk Mizoram sorkar erawh chuan a la ngaihven lo hle.

Mizorama an rawn luh fuh vaih chuan an tam nasa mai si. United Nations hian raltlante thlavang a hauh nasa mai bawk si a, Mizoram aṭanga hnawh chhuah leh chu a har khawp ang. Mizoram hian kan duh ai tam foreigner hi kan mikhual ta niin a ngaih theih bawk nen, Mizoram venhim lamah ṭan kan lak nasat deuh chu a ngai ta hle. Rohingya te pawh hi tunah chuan Mizoramah la rawn lut chiah loin, Mizoram lam pana an tlanchhiat thawm hriat tur la awm chiah lo mah se, an dinhmun a khirh zel chuan Mizoram lam hi an rawn hawi thuai a rinawm.

Ramri venhim kawngah tun aia khauh zawka kalpui a ṭha hle a, kan Mizo sipaite pawh a ṭul anga che tura chhim lama intirh phei belh a ṭha hlein ka hria. Sorkar hian hma lakna chang hre loin, Mizorama an rawn tlan luh hnuah chauh hma la ta se chuan a buaithlak tawh dawn. A lo dawngsawng tur hnai vai, Mara ram leh Lai ram mite pawh an lo inven lâwk loh chuan buaina zakhua kan la hmachhawn theihna tur a ni. Sorkar hian Mizoram venghim turin chak takin hma la teh se.

- Lalhlimawma