Covid-19 Titi

Health Minister Dr R Lalthangliana kan fak chungin north east state dang kan lo la pha lo hle mai, a dinhmun en hian Pathian remruatna a tih loh theih loh. Mut mu pawh tuah ṭha hman lovin nasa taka a bei chungin tunah USA aṭangin RT-PCR khawl chah mek a la ni a, Manipur aṭangin pakhat hawh a ni bawk. Tin, Hauva & sons-te'n Pathian malsawmna an dawn aṭangin pakhat an lei bawk.

 Vawiin hian ni 100 zet kan in lockdown ta a, CoronaVirus China ram pawn lama a darh tih kan hriat nen phei chuan ni 120 vel a ni tawh awm e. Heti chunga khawl chah chawp a la ni fo mai te hi ramria tuten emaw 

ṭawngṭaia dai an theu kha kan ring lutuk emaw ni dawn ni!

 Congress MLA zingah boruak khel an awm viau mai, Lunglei tana RT-PCR a lei hi a inphalnaah a lawmawm rualin MLA dang 39 pawh hian an duh chuan an fund aṭangin an lei thei vek awm e. Puanṭhui khawl leia puan ṭhui nghal mawp mawp theih ang hi ni se a ṭha tur, a ni si lo.

 Chief Minister Relief fund-ah nuai 1800 chuang a lut ta a, a hmanna hi uluk takin mipuiin an lo chîk ve dawn a ni. Dt 26.6.2020 tlai lama CMRF aṭanga an sanction order  no 2. Printing cost of covid-19 awarness pamphlets Rs. 10,53,000 pawh hi thil ṭul ber niin a lang tawh lo. 

May 28.2020-a Council of Minister meeting-in print media hmang tam lo tur leh electronic media hmang tam turin an rel a, hetih laia 30,00,00 copies zet lehkha inthlep sem chhuahna tur pawisa sanction order han hmuh hian min tiphu zawk thei.

 Pamphlets sem chilh ngai khawpa zirtir kan la ngai tihna em ni mipuite hi. Hei, kum chanve lai hripui avangin nunphung a buai ta a, a inkaichhawn theih dan te, a hlauhawm chin te, kan tih tur leh tih loh tur hi chu kan hre tawk tawh khawp mai. Mi inphalte'na an thawhkhawm hi a hmanna an uluk loh chuan a thawhtute thinlung pawh a na thei a, chhiatna dangin min deng leh a nih pawhin mi kut a ti zum phah thei.