Aadhaar duh loten sakhaw zalenna an nei em? Nei e, mahse ziak loh danin a nekchep

Supreme Court-in document pawimawha Aadhaar hman a phal hnuah chuan Aadhaar duh loten sakhaw zalenna an nei tawh lo, tih mai tur a ni. Mahse, Right to Freedom (mimal zalenna hnukpui) Indian Constitution Article 19-na ṭhiat a nih si loh chuan mimalin ngaihdan sawi leh ziak theihna a nei.

Amaherawhchu, sorkar hmalakna tiṭhuanawp thei a nihnaah sawi leh ziak fimkhur thiam a ṭul hle. Mihring thu aia Pathian thu ngaipawimawh zawkte hi kan fimkhur thiam a ṭul hle a ni.

Rom 13:1 “Ro­reltute chu Pathian ruat an ni.” Mahse Pathian ruat ni lo, roreltu an tam. Chung mite tana hriat pawi­mawh Bible ami tlemte lo tarlang ila; Thup. 12:7-9; Ephesi 6:12; Matt. 24:24; II Thes. 2:9; Thup. 13:3-7; 17:12,13; 17:2; 18:3-19: 14:9-11; 19:17-21. Lei leh van indonaah chuan Beram no leh thlana te, kohva te, rinawma te chuan an hneh ang. Chungte chu mi tlemte an ni dawn. Matt. 22:14, chhinchhiahte chu mi zawng zawng tih tham hial an ni ang. Mi tam zawk ngaihdan ṭawmpuitu kan nih chuan tun hi inbihchian hun a ni e.

Mi tlem zawkte ngaihdan pawh a dik vek chuang lova. Chuvangin, mitin mahni kan inbihchian a ṭul. Pathian fa kan nih tawh avangin kan thlamuang hle a ni thei, mah se “Thutak hriatna famkim chan hnua thil tisual lui te tan chuan sual thawina dang a awm tawh lo! (Heb. 10:26; 6:4-8) pawh chhiar ni se.

Pathian fa nihna tur chuan (Lal Isuan engkimah kan ai a awh tawh avangin) mawl taka rin a tawk. Mahse Diabola bum theih loh khawpa finna nei tur chuan, Bible thu harsa tak takte hi hriat tum tur a ni. Diabola chu a ei theih tur zawngin a phi ruai ruai ṭhin. Hun ṭha a neih tlem tawh avangin a hmanhmawh tawh a ni! (Thup. 12:12; I Petera 5:8.)

Mahni sual hriat a har a, chhiarpui leh a ken tel te phei chu ram hmasawnna leh mimal hmasawnna, sorkar ngaihpawimawh em em a nih avang leh, a ṭhat lohna lam an sawi ngai loh avangin mite ngaiha kawng dik ni awm taka lang, a tawp chu thihna kawng ni si, (Thup. 14:12) hi a nih hmel khawp mai. Mi fing finna chu paihthlak a, tihboral tur a ni (I Kor. 1:19)

Zoram mamawh chu zirtirna dik a ni a, mahse zirtirna dik leh dik lo hre hrang lovin beram bo angin mahni kawng kawngah kan kal a. Beram bo angin kan bona ramah thlarau lam chaw ṭha kan hmu tho. Zalenna hun tlemte kan la neh lai hian sakhaw zalenna kan neih hi hman ṭangkai dan a awm a, chu chu i ngaihven ang u. (Luka 21:34)

- T. Pachhinga