Online class Kan sawt pui meuh ang emaw chu?

Tun hnaiah hripui Covid 19 vangin nunphung a buai a, zirna uar kum berah lehkha zir hleithei lovin kan awm ta ṭhuap mai a, a zia lo hle mai. Hetih lai hian school tam tak chuan ṭhahnem ngaiin online class an buatsaih a, zirlaite theih ang angin an umzui ve bawk a. Online class hi thil ṭha leh ṭangkai tak mah nise kan hmang thiam tawk lo deuh em aw ka ti. Tih dan thar leh  technology thar a ni bawk a, ram changkangte angin kan sawt pui ve zo dawn hauh lova, chu mai pawh ni lovin phurrit tak min siamtu a ni mek niin a lang. 

Online class nge online a assignment in pekna?: Mizo­­ram online class kan tih tam ber hi online teaching ai chuan Online hmanga naupang assignment pekna a nih mai hmel. A zirtirna tak leh hriatna va pek chhawnna tak tak aiin whatapps vela group siam a, naupang assignment pek nan kan hmang deuh ber emaw ni, technology thar leh ṭha hmanna ang chi hi chu kan pawh phak meuh lo niin a lang. 

Online class la ho pawhin hmannrua te a ṭhat tawk loh avangin hmaihmaa zirtir angin  engmah a fiah thei lova, zirlai tam tak tan chuan hrethiam lo mahse zawhna zawh ngaihna a awm lova, a buaithlak viau ang le. 

An bula ṭhiante zawh tur pawh awm hek lo, a nikhua deuhin internet velah google vel aṭangin an zawng mai mai chu a nia. Mizorama kan online class tam ber hi phone hmanga kal pui a nih avangin leh kan network ṭhat tawk loh avang hian a nihna ang takin a kal pui thei lo niin lang. 

Online class nu leh pa phurrit: Online class a buai ber chu nu leh pate an ni awm e. Tuna a lan danah hian online class hi a sang lam aiin a hniam lamah an uar zawk mah niin a lang. Zirlai tam zawkin phone an nei lova, neih an la remti lem lo bawk. Lehkha zir nan nu leh pa phone hman a ngai a. Zirtirtu lamin group siamin zirlai naupangte zir tur an dah ṭhin hi naupang te zualte phei chuan an en thiam lova, an hrethiam bawk hek lo. Tlema pawl sang deuhah phei chuan zirlai a lo har  tawh a, nu leh pa pawhin an hriatthiam  phak loh a lo awm bawk a,  nu leh pa te lu tihaitu mai ni awm e. 

La hmelhriat ngai loh, zir chawpin nu leh pa in an fate zir nan an ti zel lo thei lo va. Phone ṭha nei zo lo te leh naupang pahnih pathum nei tan phei chuan a luhai thlak zual ṭhin khawp ang le. Chutah  phone ṭhenkhatah application thun theih loh emaw a awm ngei ang a. Kan network neih lah chu 4G in ziak kulhin 3G speed pawh phak lo hlawm sia. Hmun ruam leh network chhiatna awm nu leh pa chu an mangang ve ṭhin ngawtin a rinawm. 

Thil ṭul lo zirtir a tam: Online class remchang a la hian sikul ṭhenkhat chuan zirlai ni hlei lo, an zirlai atana ṭangkai pawh ni hlek lo tur, an hriatthiam phak hauh loh tur zirtir mai ching an awm niawm tak a nia. 

Entirna han pe ila: Ṭum khat chu sikul pakhat  hian pawl kua assignment atan WHO-in Covid 19 chungchanga Situation Report no 33 chu a PDF a thawnin a chhanna submit turin an lo ti a nih chu. Khatiang thil har lutuk avang khan a naupang chu sawi loh nu leh pa thlengin an buai a, an hmelhriat te thlengin an tibuai a ni. A nihna takah chuan a chhanna kha pawl kua zirlai khan hre mahse eng atan nge an hman tangkai vak ang le? 

Hetianga naupangin an zawh lo leh hriatthiam loh  lutuk thlenga zirtir hi a pawi tak zet a, heng hian naupang tih hmasawnna aiin zirlai tui lohna, zirlai zir ṭhat peih lohna harsatna a thlen thei a ni. Online course a nih avanga internet lama eng eng emaw download a lo zirtir pah kual chiam te pawh thil awm thei a ni. Chuvangin, naupang phak tawka mi thiam rualin zirtir tur an tih an zirlai bu a mi leh an phak tawk zirtir mai hi thil ṭha ber a ni fo. 

Ngaituah chian ngai online class: Tun lai khaw­velah Covid 19 vangin mi tam tak kan chiai a, kan rilru a mangang a. Chu mi hnem leh tuam dam hnathawk tur chuan Mizoram sorkar pawhin Committee on Covid 19 Psychological and Social Guidance te hial a din a. Tun ang boruakah chanchinthar nise a dik leh dik lo hriat harsa khawpin thu a leng kual a, hmun hrang hrangah Covid 19 vei an awm thar thu te, chu mi zat chu an boral tawh tih te, chu mi zat chu kha mi chu kai thar an awm tih te, kawng pui khar a ni dawn tih leh thuthang mak deuh deuh te thlengin a leng vel mek a. Chutianga boruak rit tak karah kan awm laia naupangte an zirlai atana kan lo nawr chiam chiam hi a fuh berin  a lang lo. 

Puitling pawh hetiang karah rilru mumal nei lovin kan thlek tawn laia zirlai naupang a phurrit lo siam a, lo nawr chiam chiam hi a hun ber loin ka hre ve ṭhin. 

Lehkha zir pawh a nihna takah chuan academic session pawh a ṭhen chuan kan la zo lo a, session thar ṭan hun a la ni lo bawk. Zirna hun a tam em em kara naupang zir tur lo siam sak vak vak hi sikul changkanna tura inelna tur a niin ka hre lem lo. Hetiang karah hian online class kan ti duh a nih pawhin hahdam tak leh hriat awl taka zir tur pek a, a theih phei chuan an zirlai pangngai aiin an zirlai pui thei tura zir nuam leh hlimawm zawnga hma kan lak thiam a pawimawh viau awm e. Chutih a nih loh chuan kan in nawr lutuk ang a, zirlai kan tichiai vak vak ang a, sawt hlei loah kan inti thinrimin zirna tuina hial kan hloh tir thei a ni. 

Chuvangin, online class kan ti dawn a nih chuanin hmanraw ṭha zawk leh inbuatsaihna ṭha zawk nen, zirlaite nuam tih leh sawt pui tura kan buatsaih a ṭul hle awm e.